चौदा वर्षांच्या एका शालेय मुलीला लग्नाचे आमिष दाखवून पळवून नेऊन तिच्यावर बलात्कार केल्याप्रकरणी सूरज जंगलू कदम या २२ वर्षांच्या तरुणाला एमआयडीसी पोलिसांनी अटक केली आहे. सूरज कदम (रा. २८०, कुमठा नाका, सोलापूर) हा मजुरी करतो. त्याने आपल्या घराजवळच्या शिवगंगानगर भागातील एका शालेय मुलीशी ओळख काढून तिच्याशी जवळीक वाढविली. त्याने तिच्यासमोर प्रेमाचे नाटक करून लग्न करण्याचे आमिष दाखविले. सदर मुलगीही आमिषाला बळी पडली. सूरज याने सदर मुलीला फूस लावून पळवून नेले व हैदराबाद रस्त्यावर मुळेगावजवळ गणेशनगर येथे आपल्या आप्तेष्टाच्या घरात ठेवले. त्याठिकाणी त्याने सदर मुलीवर बलात्कार केला. याबाबत मुलीच्या वडिलांनी, आपल्या मुलीला सूरज कदम याने पळवून नेण्यात आल्याची तक्रार एमआयडीसी पोलीस ठाण्यात नोंदविली होती. पोलिसांनी तपास करून सूरज यास अटक केली. मुलीची वैद्यकीय तपासणी केली असता तिच्यावर बलात्कार झाल्याचे दिसून आले. सूरज यास पाच दिवस पोलीस कोठडी मिळाली आहे.
