चंद्रपुरात महिला ठार दीड महिन्यात बळीसंख्या ९जंगलातील बिबटय़ाने आता थेट चंद्रपूर शहरात प्रवेश केला असून काल सोमवारी मध्यरात्री वेकोलिच्या महाकाली कॉलरी वसाहतीत एका अज्ञात मनोरुग्ण महिलेवर हल्ला केल्याने तिचा घटनास्थळीच मृत्यू झाला. या घटनेने गेल्या दीड महिन्यात वाघ व बिबटय़ाच्या हल्ल्यात मृत पावलेल्यांची संख्या नऊवर गेली आहे.ताडोबा-अंधारी व्याघ्र प्रकल्प व परिसरात वाघ व बिबटय़ाने अक्षरश: धुमाकूळ घातला आहे. बिबटय़ाचा जंगलातील धुमाकूळ आता थेट चंद्रपूर शहरात आलेला आहे. जुनोना व परिसरातील जंगलातून बिबटय़ाने महाकाली कॉलरीत प्रवेश करून धुमाकूळ घालणे सुरू केले आहे. काल सोमवारी मध्यरात्री बिबटय़ाने महाकाली कॉलरीत प्रवेश करून एका मनोरुग्ण महिलेवर हल्ला केला. यात तिचा घटनास्थळीच मृत्यू झाला. आज पहाटे परिसरातील लोकांना या महिलेचा मृतदेह दिसल्यावर त्यांनी याची माहिती वनाधिकारी व शहर पोलिसांना दिली. माहिती मिळताच चंद्रपूर वनखात्याचे उपवनसंरक्षक विनयकुमार ठाकरे, सहायक उपवनसंरक्षक कुळसंगे, वनपरिक्षेत्र अधिकारी शिंदे व शहर पोलीस ठाण्याचे अधिकारी दाखल झाले. ही मृत महिला अंदाजे ४० ते ४५ वयोगटातील असून सडपातळ आहे. या अज्ञात महिलेची ओळख अद्याप पटलेली नाही. महाकाली कॉलरी व परिसरातील लोकांकडे चौकशी करून या महिलेची ओळख पटविण्याचा प्रयत्न सुरू आहे. मात्र, सायंकाळपर्यंत तरी ओळख पटलेली नव्हती, अशी माहिती वनपरिक्षेत्र अधिकारी शिंदे यांनी लोकसत्ताशी बोलतांना दिली. दरम्यान, वनखात्याने परिसरात बिबट व वाघाचे पगमार्क शोधणे सुरू केले आहे. परिसरात बिबटय़ाचे पगमार्ग मिळाल्याची माहिती वनाधिकाऱ्यांनी दिली. त्यामुळे हा हल्ला बिबटय़ानेच केला असावा, असे सांगण्यात येत आहे. अनोळखी महिलेच्या मृतदेहाचा पंचनामा केल्यानंतर जिल्हा सामान्य रुग्णालयात शवविच्छेदन करण्यात आले. सध्या मृतदेह तेथेच ठेवण्यात आला आहे. वाघ व बिबटय़ाच्या हल्ल्यात मृत पावलेल्यांना वनखात्याच्या वतीने पाच लाखाची आर्थिक मदत दिली जाते. मात्र, ही मदत घेण्यासाठी कुणी समोर आलेले नाही. याच महिन्यात १ तारखेला लालपेठ कॉलरी क्रमांक दोन येथे रात्री बिबटय़ाने प्रवेश करून अंगणात खेळणाऱ्या गणेश सुरेश आत्राम या आठ वर्षीय बालकाला गंभीर जखमी केले होते. त्याला तात्काळ जिल्हा सामान्य रुग्णालयात दाखल केल्याने जीव वाचला. लालपेठ कॉलरीचा भाग हा जंगलाला लागू आहे. तीव्र उन्हामुळे जंगलातून बिबटे बाहेर पडले आहेत. सलग दोन घटना बघता पाण्याच्या शोधात हा बिबट वेकोलिच्या वसाहतीत शिरला, असे परिसरातील लोक सांगत आहेत. सततच्या घटनांमुळे या परिसरातील लोक भयभीत झाले आहेत. यापूर्वीही वेकोलिच्या कॉलनीत बिबटय़ाने प्रवेश केल्याच्या घटना घडलेल्या आहेत. गेल्या वर्षी तर संतप्त लोकांनी बिबटय़ाच्या पिल्लाला अशाच पध्दतीने ठेचून ठार केले होते. त्यानंतर आता पुन्हा महाकाली कॉलरीत बिबटय़ाने धुमाकूळ घालणे सुरू केल्याने वनखात्याने पिंजरा लावून बंदोबस्त करावा, अशी मागणी केली आहे. दरम्यान, बिबटय़ाच्या हल्ल्यातील दीड महिन्यातला हा नववा बळी आहे.हल्ल्यात गेलेले बळी २४ मार्च - अनुसया शेंडे, पालेबारसा (ता. सावली) ६ एप्रिल - ध्रुपदा मडावी, सादागड (ता. सावली) १० एप्रिल - तुकाराम धारणे व मालन मुनघाटे, आगरझरी (ता. चंद्रपूर)११ एप्रिल - ललिता पेंदाम, पाथरी (ता. सावली) १२ एप्रिल - निलिमा कोटरंगे, चोरगाव (ता. भद्रावती)१७ एप्रिल - किर्ती काटकर, पायली (ता. चंद्रपूर)१८ एप्रिल - गोपीका काळसर्पे, किटाळी (ता. चंद्रपूर) ७ मे - अज्ञात मनोरुग्ण महिला
