शेजारच्या गडचिरोली जिल्ह्य़ातील भामरागड तालुक्यातील मुरंगलच्या जंगलात आज सकाळी केंद्रीय राखीव सुरक्षा दलाचे जवान व नक्षलवाद्यांमध्ये जोरदार चकमक उडाली.
सुरक्षा दलाच्या ३७ व्या तुकडीचे सुमारे शंभर जवान आज पहाटे लाहेरीजवळच्या मुरंगलच्या पहाडीवर शोधमोहीम राबवित असतांना सकाळी नऊच्या सुमारास ही चकमक उडाली. जंगलात लपून बसलेल्या नक्षलवाद्यांनी प्रथम गोळीबार सुरू केल्यानंतर जवानांनी त्याला प्रत्युत्तर दिले. सुमारे पंधरा मिनिटे दोन्ही बाजूने गोळीबार सुरू होता. यात कोणतीही हानी झाली नसल्याची माहिती पोलिसांनी दिली.