बुलढाणा शहर व परिसरात शुक्रवारी दुपारनंतर मेघगर्जना व विजेच्या कडकडाटांसह बेमोसमी पावसाने हजेरी लावली. दुपारनंतर सायंकाळपर्यंत पावसाची रिमझिम सुरू होती. दोन दिवसापूर्वी वादळी पावसाने लोणार तालुक्याला झोडपले होते. त्यानंतर शुक्रवारी बुलढाण्यात पावसाचे आगमन झाले.गेल्या चार दिवसांपासून बुलढाणा शहर व जिल्ह्य़ात ढगाळ वातावरण झाले आहे. वातावरणातील गारठाही वाढला आहे. या पावसाने यात आणखी वाढ झाली. अकाली पावसामुळे उभ्या रब्बी शेतपिकासह भाजीपाला व फळशेतीचे मोठय़ा प्रमाणावर नुकसान होत आहे. पावसामुळे आंबा मोहोर गळून पडला. गहू व हरभऱ्याचे उत्पादन घटण्याची शक्यता निर्माण झाली आहे. भाजीपाला व फळबागांचेही नुकसान झाले आहे. सध्या तूर काढणीचा हंगाम आहे. पावसामुळे त्यात व्यत्यय निर्माण झाल्याने शेतकरी अडचणीत आला आहे. तूरपिकाचे नुकसान होण्याची शक्यता वर्तविली जात आहे. चार दिवसाच्या ढगाळ वातावरणामुळे साथीच्या व संसर्गजन्य रोगात वाढ झाली आहे.
