बाळाच्या संगोपनात स्वतःच्या आरोग्याकडे मात्र महिलांचे दुर्लक्ष…

सतत आपल्या बाळाची काळजी घेणे, झोपेचा अभाव, शारीरिक थकवा आणि ‘आता मला काहीच त्रास होत नाही’ या भावनेमुळे मातांकडून गर्भाशय तपासणीस टाळाटाळ केली जाते. परंतु ही निष्काळजी भविष्यात गंभीर आजारांना निमंत्रण देऊ शकते.

आरोग्य तपासणी का गरजेची?

गर्भाशय मुखाचा कर्करोग सुरुवातीच्या टप्प्यात वाढू शकतो. प्रसूतीनंतर शरीरात होणारे हार्मोनल बदल, जंतुसंसर्गाचा वाढलेला धोका आणि जुन्या जखमा लक्षात घेता ही तपासणी अत्यंत महत्त्वाची ठरते.

प्रसूतीनंतर बहुतांश महिला त्यांचे संपूर्ण लक्ष त्यांच्या बाळाच्या आरोग्यावर केंद्रित करतात. मात्र स्वतःच्या तपासण्यांकडे मात्र पाठ फिरवतात. गर्भाशय मुखाची तपासणी ही वेदनारहित, सोपी आणि अवघ्या काही मिनिटांत होणारी प्रक्रिया आहे. प्रसुतीनंतर ६ ते १२ आठवड्यांत ही तपासणी केल्यास भविष्यातील गंभीर आजार टाळता येऊ शकतात.

ही आहेत तपासणी टाळण्यामागची कारणं

• बाळाची जबाबदारी आणि वेळेचा अभाव
• तपासणीबाबत भीती किंवा लाज
• कुटुंबाकडून पुरेसा पाठिंबा न मिळणे
• तपासणीचे महत्त्वच माहीत नसणे

कुटुंबाची भूमिका महत्त्वाची

बाळाबरोबरच बाळाच्या आईची काळजी घेणे ही त्या नवमातेच्या कुटुंबियांची जबाबदारी आहे. वेळोवेळी तिला तपासणीसाठी प्रोत्साहन देणे गरजेचे आहे. निरोगी आईच निरोगी बाळाची जोपासना करू शकते.

बाळाच्या आरोग्यासोबतच मातेचे आरोग्यही तितकेच महत्त्वाचे आहे. प्रसूतीनंतर स्वतःकडे दुर्लक्ष न करता वेळेवर गर्भाशयाच्या मुखाची तपासणी करून घेणे गरजेचे आहे. यासाठी मातेला तिच्या कुटुंबाची साथ मिळणे गरजचे आहे. अनेकदा मूल झाल्याच्या आनंदाच मातेच्या आरोग्याकडे फारसे लक्ष दिले जात नाही. परंतु बाळाच्या अरोग्याबरोबरच मातेचे आरोग्य सांभाळणेही तितकेच महत्त्वाचे असते.