Chanakya Niti For Life : प्रत्येकाला आयुष्यात विविध संकटांचा सामना करावा लागतो. अशा परिस्थितीत योग्य विचारसरणी असणे आणि योग्य रणनीती अवलंबणे खूप महत्त्वाचे आहे. कारण- हाच संकटाचा काळ तुम्हाला कोण तुमचं आणि कोण परकं हे दाखवून देतो. दरम्यान आपल्या बुद्धिमत्तेसाठी आणि राजकीय कौशल्यासाठी ओळखले जाणारे आचार्य चाणक्य यांनी त्यांच्या धोरणात अशा अनेक गोष्टी सांगितल्या आहेत, ज्या संकटाच्या वेळी तुमचे रक्षण करू शकतात.
चाणक्य नीतीनुसार, प्रत्येक व्यक्तीने नेहमी त्याच्या आयुष्यातील काही गोष्टी इतरांपासून गुप्त ठेवल्या पाहिजेत; अन्यथा लोक त्यांचा गैरवापर करून तुमचे नुकसान करू शकतात.
१) आर्थिक परिस्थिती
चाणक्य नीतीनुसार, तुमची खरी आर्थिक स्थिती कोणालाही सांगू नका. तुम्ही श्रीमंत असो वा गरीब, जर इतरांना तुमची आर्थिक माहिती कळली, तर त्याद्वारे तुमचा गैरफायदा घेऊ शकतात. संकटाच्या वेळी लोक तुमच्या कमकुवतपणाचा फायदा घेऊन तुमचे नुकसान करू शकतात.
२) कौटुंबिक कलह
कुटुंबातील भांडणे, मतभेद किंवा समस्या बाहेरील लोकांबरोबर शेअर करू नका. चाणक्य नीतीनुसार, बाहेरील लोक तुमच्या वैयक्तिक बाबींचा वापर स्वतःच्या फायद्यासाठी करू शकतात आणि त्यामुळे तुमची प्रतिष्ठादेखील खराब होऊ शकते.
३) भविष्यातील प्लॅन
संकटाच्या वेळी तुमचा पुढचा प्लॅन किंवा रणनीती फक्त तुमच्या विश्वासू लोकांपुरती मर्यादित असावी. जर ही माहिती वेळेपूर्वी बाहेर पडली, तर तुमचे विरोधक आधीच तयारी करून तुमचे नुकसान करू शकतात.
४) कमकुवतपणा
चाणक्य यांच्या मते, तुमच्या कमकुवतपणा कोणालाही कधीही उघड करू नका किंवा सांगू नका. संकटाच्या वेळी लोक अनेकदा या कमकुवतपणाचा फायदा घेतात. तुमचे चांगले गुण बळकट करा आणि तुमच्या कमकुवतपणा लपवून ठेवा, हीच यशाची गुरुकिल्ली आहे.