काश्मीरमध्ये अपघाती स्फोटात लष्कराचे १२ जवान जखमी

काश्मीरच्या पुलवामा जिल्ह्यात असणाऱ्या भारतीय लष्कराच्या तळावर शनिवारी झालेल्या अपघाती स्फोटात १२ जवान जखमी झाले आहेत. यापैकी सात जवानांची प्रकृती गंभीर आहे. पुलवामा जिल्ह्यातील अवंतीपुरा परिसरात भारतीय लष्कराचे युद्ध प्रशिक्षण केंद्र आहे. याठिकाणी ही घटना घडली. या घटनेनंतर गंभीर जखमी झालेल्या १२ जवानांना तातडीने श्रीनगरच्या लष्करी रूग्णालयात दाखल करण्यात आल्याची माहिती लष्कराच्या अधिकाऱ्यांकडून देण्यात आली आहे. या स्फोटामागचे नेमके कारण इतक्यात सांगणे शक्य नाही. मात्र, हा स्फोट अपघाती असावा. परंतु, या सगळ्या घटनेची सखोल चौकशी होईपर्यंत काहीही बोलणे योग्य नसल्याचेही यावेळी लष्कराकडून सांगण्यात आले.