एअर इंडियाकडून लवकरच प्रवाशांना विमानात वाय-फायची सुविधा उपलब्ध करून देण्यात येण्याची शक्यता आहे. ‘एअर इंडिया’च्या देशांतर्गत सेवेसाठी वापरल्या जाणाऱ्या ए-३२० या विमानांमध्ये ही सुविधा असेल. आम्ही विमानात वाय-फाय सुविधा पुरविण्याच्यादृष्टीने आमचे काम सुरू आहे. आम्ही यासंबंधी विमानाची निर्मिती करणाऱ्या कंपनीशी सल्लामसलत करत असून वाय-फायसाठी लागणारे उपकरण विमानात बसविण्यासाठी त्यांच्या परवानगीची वाट बघत आहोत. ही सुविधा नक्की कधीपासून सुरू होणार, याबद्दल आताच काही स्पष्ट सांगता येणार नाही. मात्र, आमच्या अंदाजानुसार जून ते जुलैदरम्यान आमच्या देशांतर्गत विमानप्रवासात प्रवाशांना वाय-फाय वापरता येईल, असे एअर इंडियाचे प्रमुख अश्वानी लोहानी यांनी सांगितले. मात्र, या वाय-फायचा नेमका स्पीड किती असेल किंवा डेटाची किती मर्यादा असेल, याबाबत अद्याप कोणतीही स्पष्टता नाही.
एअर इंडियाने अशाप्रकारे वायफाय सुरु केल्यास, विमानात वायफाय पुरवणारी एअर इंडिया देशातील पहिली विमान कंपनी ठरणार आहे. एअर इंडिया सुरुवातीला मोफत वायफाय देण्याची शक्यता आहे. मात्र, विशिष्ट अवधीनंतर या सेवेसाठी पैसे आकारण्याची शक्यताही आहे. मात्र, या मोफत वाय-फायचा वापर इमेल चेक करणे, पाठवणे, व्हॉट्सअॅप यासाठीच होऊ शकतो. इमेल, व्हॉट्सअॅपसोबत आणखी कोणत्या गोष्टींसाठी वायफाय सेवेचा लाभ घेता येईल, हे एअर इंडियाकडून अधिकृत सांगण्यात आले नाही.
देशांतर्गत विमानसेवेत वायफाय सेवेला कसा प्रतिसाद मिळतो, हे पाहून या सेवाचा पुढे विस्तार केला जाणार आहे. त्यानंतर आंतरराष्ट्रीय विमानसेवेतही वायफाय देण्यावर विचार केला जाईल. गल्फ कॅरियर आपल्या प्रवाशांसाठी १० एमबी मोफत इंटरनेट डेटा उपलब्ध करुन देते. इमेल चेक करणं, पाठवण किंवा फेसबुक, व्हॉट्सअॅप अपडेट करण्यासाठी इतका डेटा पुरेसा असतो. विशेष म्हणजे, प्रवाशांना १० एमबीपेक्षा अधिक इंटरनेट डेटा हवा असल्यास, प्रवाशी अधिकचे पैसे मोजून सेवेचा लाभ घेऊ शकतात.