एअर इंडियाला ९० लाखांचा दंड; अपात्र वैमानिकाने विमान चालविल्याने कारवाई

नागरी विमान वाहतूक महासंचालनालयाने, ( डीजीसीए ) टाटा समूहाची मालकी असलेल्या एअर इंडियाला प्रशिक्षित नसलेल्या वैमानिकाने विमान चालवल्याप्रकरणी ९० लाख रुपयांचा दंड ठोठावला आहे. तसेच एअर इंडियाचे संचालक पंकुल माथूर आणि प्रशिक्षण संचालक मनीष वासवडा यांना ६ लाख रुपये आणि ३ लाख रुपयांचा दंड ठोठावण्यात आला आहे.

एअर इंडियाने विनाप्रशिक्षित वैमानिकाकडून विमानाचे उड्डाण करवून घेतले. यात सुरक्षेचा कोणताही विचार करण्यात आला नाही. त्यामुळे ही गंभीर घटना असल्याचे ‘डीजीसीए’ने आपल्या प्रसिद्धीपत्रकात म्हटले आहे. भविष्यात अशा घटना घडू नयेत यासाठी सावधगिरी बाळगायचा इशारा संबंधित वैमानिकाला देण्यात आला आहे.

हेही वाचा >>>Crime News : ट्यूशनवरुन घरी पतरणाऱ्या अल्पवयीन विद्यार्थिनीवर सामूहिक बलात्कार, बेशुद्धावस्थेत सापडली मुलगी, कुठे घडली घटना?

विमान कंपनीने १० जुलै रोजी एक अहवाल सादर केल्यावर ही घटना निदर्शनास आली होती. त्यानंतर ‘डीजीसीए’कडून कंपनीचे कामकाज, कागदपत्रे आणि शेड्युलिंगची तपासणी केली. तपासाअंती यात गंभीर चुका आढळून आल्या होत्या. त्यानंतर २२ जुलै रोजी या प्रकरणी कारणे दाखवा नोटीस पाठवण्यात आली. या प्रकरणी संबंधितांकडून समाधानकारक उत्तर मिळाले नसल्याचे ‘डीजीसीए’ने म्हटले आहे. त्यामुळे नियमानुसार पुढील कारवाई करून एअर इंडियाला ९० लाखांचा दंड ठोठावण्यात आला.