बँकाकमध्ये २० लोकांचा बळी घेणाऱ्या बाँबस्फोटाचे विश्वासार्ह धागेदोरे अद्याप हाती लागले नसले, तरी एका नव्या सीसी टीव्ही फुटेजमुळे पोलिसांना तपासाची आशा निर्माण झाली आहे. ज्या ठिकाणी दुसरा बाँबस्फोट झाला, तेथे एक अनोळखी व्यक्ती एका कालव्यात एक पॅकेट फेकत असल्याचे या चित्रिकरणात दिसून येत आहे.
स्थानिक दूरचित्रवाहिन्यांकडून मिळालेल्या सीसी टीव्ही फुटेजमध्ये निळ्या रंगाचा टी-शर्ट घातलेला एक माणूस पादचारी पुलावरून एक पॅकेज त्याच ठिकाणी फेकत असल्याचे दिसत आहे, जेथे मंगळवारी स्फोट झाला होता. यात कुणीही जखमी झाले नव्हते.बाँबस्फोटातील मुख्य आरोपीचे रेखाचत्रि आणि व्हिडिओ पोलिसांनी जारी केला आहे. परदेशी व्यक्ती असलेला हा माणूस एका नेटवर्कसाठी काम करत असल्याचे मानले जात आहे. पोलिसांनी हल्लेखोरांचा शोध जारी ठेवला असला तरी या प्रकरणी अद्याप कुणालाही अटक करण्यात आलेली नाही.