केरळमधील थिरुअनंतपुरम येथील मंदिरात पूजा करताना काँग्रेस नेते शशी थरुर गंभीर जखमी झाले असून त्यांच्या डोक्याला इजा झाली आहे. त्यांच्या डोक्याला सहा टाके पडले आहेत. सध्या त्यांची प्रकृती धोक्याबाहेर असल्याचं सांगण्यात आलं आहे. दरम्यान जखमी अवस्थेतील शशी थरुर यांचा फोटो समोर आला असून पिवळा कुर्ता घातलेला दिसत आहे. त्याच्या कुर्त्यावर रक्ताचे डागही दिसत आहेत.

मिळालेल्या माहितीनुसार, शशी थरुर मंदिरात तुला करत असताना हा अपघात झाला. केरळमध्ये आज नववर्ष साजरा केला जात आहे. नववर्षाच्या निमित्ताने राज्यभरातील लोक मंदिरात जाऊन प्रार्थना करत आहेत.

मंदिरात विधी सुरु असताना शशी थरुर जखमी झाले असता तात्काळ त्यांना रुग्णालयात दाखल करण्यात आलं. तिथे त्यांच्या डोक्याला सहा टाके लावण्यात आले. सध्या त्यांची प्रकृती स्थिर आहे. शशी थरुर सलग तिसऱ्यांदा थिरुअनंतपुरम लोकसभा मतदारसंघातून जिंकण्यास उत्सुक आहेत. 23 एप्रिल रोजी केरळमध्ये पहिल्या टप्प्यातील मतदान होणार आहे.