पॅन कार्ड आणि आधार कार्ड लिंक करण्याची तारीख सरकारकडून वाढवण्यात आली आहे. सरकारच्या नव्या आदेशानुसार, पॅन-आधार लिंक करण्याची मुदत ३१ मार्च २०२१ पर्यंत वाढवण्यात आली आहे. याआधी ३० जून २०२० पर्यंत पॅन-आधार लिंक करण्याचा आदेश होता. यामुळे अद्यापही पॅन-आधार लिंक न केलेल्यांना दिलासा मिळाला आहे. काही मिनिटांच्या या प्रक्रियेसाठी त्यांना अजून काही महिन्यांची मुभा मिळाली आहे.
आयकर विभागाच्या सूचनेनुसार ज्या व्यक्तींनी पॅन कार्ड आणि आधार कार्ड लिंक केलं नसेल त्यांना पॅन कार्ड वापरताना अडचणी निर्माण होऊ शकतील. आधार कार्डशी लिंक नसणारे पॅन कार्ड हे निष्क्रिय म्हणजेच रद्द केल्याप्रमाणे असतील असंही आयकर विभागाने स्पष्ट केलं आहे.
पॅनकार्ड निष्क्रिय झाल्यास कोणतेही आर्थिक व्यवहार करता येणार नाहीत. आयकर विभागाच्या नियमांनुसार मोठे आर्थिक व्यवहार करताना पॅन कार्ड क्रमांक देणे बंधनकारक आहे. पॅन कार्ड आणि आधार कार्ड लिंक न करता आयकर विवरण भरता येण्याची मूभा देण्यात आली आहे. मात्र आय़कर विवरणाचा अर्ज भरला असला तरी जोपर्यंत पॅन आणि आधार लिंक केले जात नाही तोपर्यंत तो अर्ज आयकर खात्याकडून विचाराधीन घेतला जाणार नाही.
नवीन नियमांनुसार पॅन कार्ड काढण्यासाठी आधार कार्ड अनिवार्य आहे. मात्र पुन्हा पॅन कार्ड काढताना तुम्हा आधार कार्ड दाखवणे बंधनकारक असणार आहे. त्यावेळी जर तुम्ही आधार कार्ड असूनही ते लिंक केलं नसल्याचं निदर्शनास आल्यास पॅन कार्डधारकाकडून १० हजार रुपयांपर्यंत दंड आकारला जाऊ शकतो. आयकर विभागाच्या नियमांनुसार सेक्शन २७२ बी अंतर्गत हा दंड आकरण्यात येऊ शकतो.
पॅन कार्ड वापरुन आधी केलेले सर्व व्यवहार ग्राह्य धरले जातील. नवीन पॅन कार्ड काढल्यानंतर ठराविक कालमर्यादेमध्ये तुम्ही आधार आणि पॅन लिंक केल्यास तुमचे पॅन कार्ड पुन्हा सक्रीय होईल. जर तुम्ही आयकर परताव्यासाठी अर्ज केला नसेल तर अशा प्रकरणामध्ये तुम्हाला कालमर्यादा ओलांडून गेल्यानंतर कोणत्याही परिस्थितीत अर्ज दाखल करता येणार नाही. आयकर विभागाच्या वेबसाईटवर पॅन आणि आधार लिंक करण्याची सुविधा उपलब्ध आहे.
अनिवासी भारतीयांना (एनआरआय) पॅन कार्ड आणि आधार कार्ड लिंक करणे बंधनकारक नाही. मात्र काही आर्थिक व्यवहारांसाठी एनआरआय व्यक्तींकडे आधार कार्डची विचारणा केली जाऊ शकतो. अनिवासी भारतीय व्यक्तींना आधार कार्डसाठी अर्ज करता येतो.