जम्मू व काश्मीर भाजप प्रदेशाध्यक्षपदी आमदार सत शर्मा यांची बिनविरोध निवड करण्यात आली. खासदार जुगलकिशोर शर्मा यांच्या जागी ही निवड झाली आहे. नुकत्याच झालेल्या लडाख स्वायत्त विकास परिषदेच्या निवडणुकीत भाजपला विजय मिळवून देण्यात त्यांनी महत्त्वाची कामगिरी बजावली होती.
शर्मा यांच्या नेतृत्वात भाजप बळकट होईल अशी अपेक्षा उपमुख्यमंत्री निर्मल सिंह यांनी नव्या प्रदेशाध्यक्षांच्या पदग्रहण समारंभात व्यक्त केली.
आगामी स्थानिक स्वराज्य संस्थांच्या निवडणुकीत चांगल्या कामगिरीचे आव्हान त्यांच्यापुढे असेल. पक्षाला मजबूत करण्यासाठी प्रयत्न करू, असे शर्मा यांनी निवडीनंतर स्पष्ट केले.