परंपरागत प्रतिस्पर्धी भारत-पाकिस्तान यांच्यातील बहुप्रतीक्षित मर्यादित षटकांच्या मालिकेसाठी साऱ्यांचीच उत्सुकता आता शिगेला पोहोचली आहे. अधिकृत प्रक्षेपणकर्ते ईएसपीएन-स्टार स्पोर्ट्स यांच्या तिजोरीत या मालिकेमुळे १४० कोटींहून अधिक रुपये जमा होणार आहेत.
भारत-पाकिस्तान मालिकेच्या पाश्र्वभूमीवर ईएसपीएन-स्टार स्पोर्ट्सच्या जाहिरात उलाढालीत मोठी वाढ झाली आहे. विश्वसनीय सूत्रांनी दिलेल्या माहितीनुसार, एकदिवसीय सामन्यासाठी जाहिरातीचे दर ७ ते ७.५ लाख रुपये ठेवण्यात आले आहेत आणि ट्वेन्टी-२० सामन्यासाठी प्रती १० सेकंदांसाठी नऊ लाख रुपये दर ठेवला आहे. या छोटेखानी मालिकेतूनही ईएसपीएन-स्टार स्पोर्ट्सला १४० कोटी रुपयांपेक्षा अधिक फायदा होणार आहे.
ईएसपीएन-स्टार स्पोर्ट्स यांच्याकडून भारत-पाकिस्तान मालिकेचे स्टार क्रिकेट आणि स्टार क्रिकेट एचडीवर इंग्रजीतून आणि स्टार स्पोर्ट्सवर हिंदीतून प्रक्षेपण करण्यात येणार आहे.