Cheteshwar Pujara Half Century : चेतेश्वर पुजाराला त्याच्या कामगिरीमुळे खूप टीकेला सामोरे जावे लागले होते. त्याला भारतीय कसोटी संघातूनही वगळण्यात आले. मात्र पुजाराने आपली मेहनत थोडीही कमी केली नाही. आता त्याने आपल्या बॅटने टीकाकारांना चोख उत्तर दिले आहे. पुजाराने सौराष्ट्रकडून खेळताना रणजी ट्रॉफी २०२३-२४ मध्ये दमदार अर्धशतक झळकावले आहे. त्याने अर्पित वसावडासोबत मजबूत भागीदारीही केली आहे.
वास्तविक, राजकोटमध्ये सौराष्ट्र आणि झारखंड यांच्यात रणजी करंडक सामना खेळला जात आहे. या सामन्यात झारखंडचा संघ पहिल्या डावात केवळ १४२ धावा करत सर्वबाद झाला. त्याला प्रत्युत्तर म्हणून सौराष्ट्र संघ आता फलंदाजी करत आहे. सौराष्ट्रकडून पुजारा चौथ्या क्रमांकावर फलंदाजीला आला. त्याने शानदार कामगिरी करत अर्धशतक झळकावले. पुजाराने १२५ चेंडूंचा सामना करत नाबाद ८५ धावा केल्या आहेत. वृत्त लिहेपर्यंत त्याने ८चौकार मारले होते. पुजारामुळे सौराष्ट्र संघ मजबूत स्थितीत पोहोचला आहे.
या सामन्यात सलामीवीर हार्विक देसाईने सौराष्ट्रला शानदार सुरुवात करून दिली. हार्विकने ११९ चेंडूंचा सामना करत ८५ धावा केल्या. त्याच्या खेळीत १४ चौकारांचा समावेश होता. स्नेल पटेलने १५ धावांची खेळी केली. शेल्डन जॅक्सननेही अर्धशतक झळकावले. जॅक्सनने ७४ चेंडूंचा सामना करत ५४ धावा केल्या. त्याने ८ चौकार आणि एक षटकार मारला. पुजाराने जॅक्सनसोबत चांगली भागीदारी केली. त्याने अर्पितसोबत चांगली भागीदारीही केली. वृत्त लिहिपर्यंत अर्पितने ३३ धावा केल्या होत्या. वृत्त लिहिपर्यंत सौराष्ट्रने ८१ षटकानंतर ३ गडी गमावून २९६ धावा केल्या होत्या
हेही वाचा – INDW vs AUSW 1st T20 : स्मृती मंधानाने केला मोठा पराक्रम, रोहित-विराटच्या ‘या’ खास क्लबमध्ये झाली सामील
दक्षिण आफ्रिका दौऱ्यात सेंच्युरियन आणि केपटाऊनच्या उसळत्या खेळपट्ट्यांवर टीम इंडियाचे फलंदाज निष्प्रभ ठरत असताना चेतेश्वर पुजारा सोशल मीडियावर ट्रेंड झाला होता. अय्यरला संघातून वगळून पुजाराचा कसोटी संघात समावेश करण्याची मागणी चाहत्यांनी केली. यामागे पुजाराच्या परदेशातील अनेक संस्मरणीय खेळी खेळल्या आहेत.