एपी, तुरिन
वाढते वय यामुळे ख्रिस्तियानो रोनाल्डोच्या निवृत्तीविषयीच्या जोरदार चर्चा सुरू आहेत. मात्र आपण यापुढेही खेळत राहणार असल्याचे स्पष्ट करत रोनाल्डोने युव्हेंटस आणि आपल्या चाहत्यांना दिलासा दिला आहे.
‘‘मी अद्याप निवृत्तीचा विचार केलेला नाही. वाढते वय हे फक्त आकडे आहेत. ३४, ३५ किंवा ३६व्या वर्षी कारकीर्दीचा शेवट होतो, असा त्याचा अर्थ होत नाही. मी माझ्या कामगिरीने वेळोवेळी स्वत:ला सिद्ध केले आहे. मी ज्याप्रकारे खेळत आहे, ज्या पद्धतीने खेळाविषयी विचार करत आहे, खेळातील अचूकता यामुळे मी अधिक परिपक्व झालो आहे, असे मला वाटते,’’ असे रोनाल्डोने सांगितले.
‘मी सध्या फुटबॉलबाहेरील गोष्टींचा आनंद लुटत असून पुढील एक किंवा दोन वर्षांत काय होईल, हे मला माहीत नाही,’ असे रोनाल्डोने काही दिवसांपूर्वी मुलाखतीत म्हटले होते. तेव्हापासून रोनाल्डोच्या निवृत्तीच्या चर्चाना उधाण आले होते. रोनाल्डोने काही दिवसांपूर्वीच व्यावसायिक फुटबॉलमधील ७००व्या गोलची नोंद केली होती. तसेच त्याला जगातील सर्वोत्तम फुटबॉलपटूसाठी दिल्या जाणाऱ्या बलॉन डीऑर पुरस्कारासाठीही नामांकन मिळाले आहे.
निवृत्तीविषयी आणि आगामी आव्हानांविषयी रोनाल्डो म्हणाला की, ‘‘आम्हाला सेरी-ए तसेच चॅम्पियन्स लीग करंडक उंचवायचा आहे. युव्हेंटसने मोठी स्वप्ने पाहायला हवीत. आम्हाला सर्व स्पर्धा जिंकायच्या आहेत. हे कठीण आहे. पण या जगात अशक्य असे काहीच नाही.’’
बलॉन डीऑर पुरस्कारासाठी मेसीसमोर रोनाल्डो, व्हॅन डिकचे आव्हान
जगातील सर्वोत्तम फुटबॉलपटूसाठी दिल्या जाणाऱ्या बलॉन डीऑर पुरस्कारासाठी यंदा लिओनेल मेसीसमोर ख्रिस्तियानो रोनाल्डो आणि विर्जिल व्हॅन डिक यांचे आव्हान असणार आहे. ब्राझीलचा नेयमार मात्र या शर्यतीत नसेल. सोमवारी या पुरस्कारासाठी ३० जणांची यादी तयार करण्यात आली. त्यातून जवळपास अडीच वर्षे पॅरिस सेंट-जर्मेनचे प्रतिनिधित्व करणाऱ्या नेयमारचे नाव वगळण्यात आले होते. या पुरस्कारावर असलेली मेसी आणि रोनाल्डो यांची हुकमत गेल्या वर्षी लुका मॉड्रिचने मोडीत काढली होती. मॉड्रिचने रेयाल माद्रिद आणि क्रोएशियाच्या यशात मोलाचा वाटा उचलला होता. २ डिसेंबर रोजी या पुरस्कारांचे वितरण पॅरिसमध्ये केले जाणार आहे.