भारतीय यष्टीरक्षक आणि फलंदाज ऋषभ पंतचे नवीन फोटो समोर आले आहेत. कार अपघातातून सावरण्यासाठी ऋषभ पंत पूर्ण प्रयत्न करत आहे. रुग्णालयातून डिस्चार्ज मिळाल्यानंतर पंत आता आपल्या घरी आला आहे. त्याच्या पायाला अद्याप सूज आहे. त्याच्या उजव्या पायाला गंभीर दुखापत झाली होती. शस्त्रक्रियेनंतर आता दुखापतीतून बाहेर पडून पुन्हा मैदान गाजवण्याचं त्याचं ध्येय आहे.
दरम्यान, पंतचा एक फोटो समोर आला आहे. ज्यामध्ये तो कुबड्यांच्या साह्याने चालण्याचा प्रयत्न करताना दिसत आहे. पंतचा उजवा पाय अजूनही सुजलेला आहे, हे फोटोत स्पष्टपणे दिसत आहे. पण तरीही पंतच्या पुनरागमनाच्या आशा उंचावल्या आहेत. पंतने सोशल मीडिया अकाउंटवर फोटो शेअर केले आहेत.
संबंधित फोटोंना कॅप्शन देताना पंतने लिहिलं – “एक पाऊल पुढे… एक पाऊल मजबूत… एक पाऊल उत्तम…” संबंधित फोटोत ऋषभ पंत चालण्याचा प्रयत्न करताना दिसत आहे. पंत सध्या आयपीएलमधून बाहेर आहे. आंतरराष्ट्रीय क्रिकेट सामन्यात पदार्पण करण्याबाबत अद्याप अनिश्चितता कायम आहे. पण तो लवकरच मैदानात परतेल, अशी अपेक्षा आहे.
खरं तर, डिसेंबर २०२२ मध्ये ऋषभ पंत आपल्या आईला भेटण्यासाठी दिल्ली ते डेहराडून असा कारने प्रवास करत होते. तो स्वत: कार चालवत होता. त्यावेळी त्याच्या कारला भीषण अपघात झाला. त्याची बीएमडब्ल्यू कार दुभाजकाला धडकली. ही दुर्घटना घडल्यानंतर पंत कसा-बसा कारमधून बाहेर पडला. मात्र काही मिनिटांतच गाडीने पेट घेतला, यामध्ये पंतची कार जळून खाक झाली. या अपघातात ऋषभला गंभीर दुखापत झाली होती. मागील अनेक दिवसांपासून त्याच्यावर रुग्णालयात उपचार सुरू होते. आता त्याला डिस्चार्ज देण्यात आला असून तो अपघातातून सावरत आहे