विलक्षण इच्छाशक्तीचे प्रतीक असरणाऱया रॉजर फेडरर याने पुन्हा एकदा आपणंच टेनिसचे राजे असल्याचे सिद्ध करून दाखवले. वाढत्या वयावरून नेहमी प्रश्नांच्या गोताळ्यात सापडणाऱया फेडररने ऑस्ट्रेलियन ओपनमध्ये स्पेनच्या राफेल नदावर मात करून आपल्या टीकाकारांची तोंडं बंद केली. मेहनतपूर्वक जपलेली तंदुरुस्ती, कसोशीने उंचावत नेलेला खेळाचा दर्जा आणि खेळावरचं निस्सीम प्रेम या आपल्या गुणवैशिष्टयांनी फेडररने उंचावलेला टेनिसचा दर्जा आजही कायम राखला. फेडररने आपल्या सर्वोत्तम कामगिरीचा नजाराण पेश करत ऑस्ट्रेलियन ओपनच्या अंतिम सामन्याच्या चुरशीच्या लढतीत राफेल नदालवर ६-४, ३-६, ६-१, ३-६, ६-३ असा विजय प्राप्त केला. फेडररने या विजयासह आपल्या कारकीर्दीतील १८ ग्रँडस्लॅम विजेतेपद जिंकण्याचा विश्वविक्रम केला. विशेष म्हणजे, फेडररचा हा ऑस्ट्रेलियन ओपनमधील १०० वा सामना होता. पाच वर्षांनंतर फेडररच्या खात्यात ग्रँडस्लॅमचे विजेतेपद जमा झाले.
जिंकण्याची अविरत उर्मी, अचंबित करणारे सातत्य ही गुणवैशिष्ट्ये असलेले दोन दिग्गज खेळाडू जेव्हा एकमेकांसमोर उभे ठाकतात तेव्हा टेनिस चाहत्यांसाठी एक विलक्षण संधी असते. २०११ नंतर आज पहिल्यांदाच रॉजर फेडरर आणि राफेल नदाल ही कट्टर प्रतिस्पर्ध्यांची लढत टेनिस चाहत्यांना ऑस्ट्रेलियाच्या मेलबर्नमध्ये पाहायला मिळाली. संपूर्ण जगाचे फेडरर-नदाल लढतीकडे लक्ष लागून होते. सामन्यात फेडररने आपल्या लौकिकाला साजेशी कामगिरी करत जोशात सुरूवात देखील केली होती. फेडररने पहिला सेट ६-४ ने जिंकून श्रीगणेशा केला होता, तर नदालनेही दुसऱया सेटमध्ये फेडररला जशास तसे प्रत्युत्तर देऊन ३-६ असा विजय प्राप्त केला. मग फेडररने तिसऱया सेटमध्ये घोटीव फटक्यांचा नजराणा पेश करत ६-१ ने वर्चस्व गाजवले. तिसऱया सेटमधील मानहानीकारक पराभवाचा कोणताही मानसिक दबाव निर्माण न होऊ देता नदालने चौथ्या सेटमध्ये चांगली सुरूवात केली आणि सेट ३-६ ने जिंकला देखील. चौथ्या सेटमध्ये दोघांमध्ये अत्युच्च दर्जाची चढाओढ पाहायला मिळाली. पाचव्या आणि निर्णायक सेटमध्ये सामन्याला रोमांचक वळण मिळाले होते. दोघांमध्ये प्रत्येक गुणासाठी कमालीचे द्वंद्व पाहायला मिळाले. फेडररने पाचव्या सेटमध्ये आपल्या पोतडीतील नजाकती फटक्यांचा नजारा पेश करत तब्बल साडेतीन चाललेल्या या लढाईत विजय साजरा केला.
फेडररच्या खात्यात आता तब्बल १८ ग्रँडस्लॅम जमा झाली आहेत. तर राफेल नदालकडे एकूण १४ ग्रँड स्लॅम जेतेपदं आहेत. याआधी या दोघांमध्ये ग्रँड स्लॅम स्पर्धेत असंख्य मॅरेथॉन लढती झाल्या आहेत. तशाच अनुभवाची प्रचिती जगभरातील चाहत्यांना मिळाली. खरंतर हार्ड कोर्टवरच्या लढतीतही नदालकडे ९-७ अशी आघाडी होती. ती आज ९-८ अशी कमी झाली आहे.
Roger Federer vs Rafael Nadal
Live Updates
पहिल्या सेटमध्ये पहिला गुण नदालच्या खात्यात
नदालकडून दमदार सुरूवार, नदाल ४०-० फेडरर
नदालचा श्रीगणेशा, नदाल १५ – ० फेडरर
नदाल करतोय सर्व्हिस
फेडरर विरुद्ध नदाल महासंग्रामाला सुरूवात
नाणेफेकीचा कौल नदालच्या बाजूने
रॉजर फेडरर आणि राफेल नदाल कोर्टवर दाखल, टेनिस चाहत्यांचा जल्लोष
फेडरर विरुद्ध नदाल सामना पाहण्यासाठी कोर्टवर चाहते उत्सुक
पुढील अर्ध्यातासात महासंग्राम सुरू होणार
मेलबर्नच्या रोड अरेना कोर्टवर तयारी पूर्ण
फेडरर आणि नदाल ऑस्ट्रेलियन ओपनच्या अंतिम लढतीसाठी सर्व सज्ज