प्रो कबड्डी लीगच्या (पीकेएल) ३८व्या सामन्यात हरयाणा स्टीलर्सने गतविजेत्या बंगाल वॉरियर्सचा ४१-३७ असा पराभव करत रोमांचक विजय नोंदवला. या विजयासह हरयाणा स्टीलर्सचा संघ गुणतालिकेत सहाव्या स्थानावर पोहोचला आहे, तर दुसरीकडे बंगाल वॉरियर्सचा संघ सातव्या स्थानावर घसरला आहे.
पूर्वार्धानंतर बंगाल वॉरियर्सने हरयाणा स्टीलर्सविरुद्ध १८-१५ अशी आघाडी घेतली. या सामन्यात पूर्वार्धात दोन्ही संघांच्या बचावपटूंची कामगिरी जबरदस्त होती. बंगालच्या सचिन विट्टलाने हाय-५ पूर्ण केले, तर हरियाणा स्टीलर्सकडून सुरेंदर नाडा आणि जयदीप कुलदीपने प्रत्येकी ३ गुण घेतले. दरम्यान, १३व्या मिनिटाला बंगाल वॉरियर्सने हरयाणाला ऑलआऊट केले. मात्र, हरयाणा स्टीलर्सही मागे राहिले नाहीत, कारण २० मिनिटे संपण्यापूर्वीच ते त्यांच्या प्रतिस्पर्ध्यांना ऑलआऊट करण्याच्या जवळ पोहोचले.
उत्तरार्धाच्या सुरुवातीला हरयाणा स्टीलर्सने बंगाल वॉरियर्सला ऑलआऊट केले. हरयाणाने आपली पकड कमकुवत होऊ दिली नाही आणि त्यामुळेच ते दुसऱ्यांदा गतविजेत्यांना ऑलआऊट करण्याच्या जवळ पोहोचले. मात्र, बंगालच्या दोन्ही इराणी खेळाडूंनी (अबोझर मिघानी आणि मोहम्मद नबीबक्ष) आपल्या संघाला उत्कृष्ट टॅकलने वाचवले. मीतूच्या शानदार चढाईच्या बळावर हरयाणाने अखेर बंगालला दुसऱ्यांदा ऑलआऊट केले. मीतूनेही सुपर १० पूर्ण केला, तर दुसरीकडे बंगाल वॉरियर्सचा कर्णधार मनिंदर सिंगनेही सुपर १० पूर्ण केला.
हेही वाचा – श्रीलंकेच्या खेळाडूचा कसोटी क्रिकेटला रामराम; ७ जानेवारी तारीख ठरली खास!
बंगालने पुनरागमन करण्याचा प्रयत्न केला, परंतु विकास कंडोलाने त्याच्या चढाईत दोन गुण मिळवले आणि सामना बंगालपासून दूर नेला. शेवटी हरयाणा स्टीलर्सने सामना जिंकला. बंगाल वॉरियर्सचा कर्णधार मनिंदर सिंगने या सामन्यात सर्वाधिक १४ गुण मिळवले.