कर्जत : जामखेड कृषी उत्पन्न बाजार समितीचे उपसभापती व आमदार रोहित पवार यांचे समर्थक कैलास वराट यांच्याविरुद्ध काल, सोमवारी जिल्हाधिकाऱ्यांकडे समितीच्या १२ सदस्यांनी अविश्वास ठराव दाखल केला आहे. विधान परिषदेचे सभापती राम शिंदे यांनी राष्ट्रवादी काँग्रेसचे (शरद पवार गट) आमदार रोहित पवार यांना यानिमित्ताने पुन्हा एक धक्का दिला आहे.जामखेड बाजार समितीमधील आमदार पवार समर्थक तीन सदस्य गेल्या काही दिवसात सभापती राम शिंदे यांना येऊन मिळाल्याने त्याची परिणती अविश्वास ठराव दाखल होण्यात झाली आहे. बाजार समितीची निवडणूक झाली तेव्हा दोन्ही बाजूंचे प्रत्येकी ९ सदस्य निवडून आले होते. त्यामुळे सभापती व उपसभापती या दोन्ही पदांसाठी ईश्वरचिठ्ठीने निवड करण्यात आली. त्यामध्ये सभापतिपद भाजपचे शरद कार्ले यांना तर उपसभापतिपद राष्ट्रवादीचे कैलास वराट यांना मिळाले होते.

राम शिंदे यांची सभापतिपदी वर्णी लागल्यानंतर त्यांच्या आमदार पवार विरोधी मोहिमेला चालना मिळाली आणि गेल्या काही दिवसांत अंकुश ढवळे, राहुल बेदमुथा व नारायण जायभाय हे तीन पवार समर्थक सदस्य भाजपकडे आले. अविश्वास प्रस्तावावर या तिघांसह सभापती शरद कार्ले, सचिन घुमरे, नंदकुमार गोरे, विष्णू भोंडवे, गौतम उतेकर, गणेश जगताप, वैजनाथ पाटील, रवींद्र हलगुंडे व सीताराम ससाने अशा एकूण १२ सदस्यांच्या सह्या आहेत.

या प्रस्तावात म्हटले की, कैलास वराट यांनी कायद्याचे उल्लंघन करून विश्वास गमावलेला आहे. ते मनमानी पद्धतीने कारभार करतात. बाजार समितीच्या उपविधीप्रमाणे कामकाज करत नाहीत. आम्ही सुचवलेल्या बाबींकडे हेळसांड करून दुर्लक्ष करतात. समितीमध्ये येणाऱ्या शेतकऱ्यांना, नागरिकांना सुविधा मिळाव्यात म्हणून सदस्यांनी सुचवलेल्या सूचनांकडे दुर्लक्ष करतात. बाजाराची आर्थिक उन्नती होण्यासाठी त्याचबरोबर शेतकऱ्यांच्या मालाला व्यवस्थित सोयीसुविधा उपलब्ध करण्यासाठी कोणतीही मदत करत नाहीत. शासनाकडून वेळोवेळी निश्चित करण्यात आलेल्या किमान आधारभूत किमतीपेक्षा कमी किमतीत खरेदी व विक्री होऊ नये यासाठी उपाय न करण्याच्या दृष्टिकोनातून मदत करत नाहीत. त्यामुळे उपसभापती वराट यांनी सदस्यांचा विश्वास गमावला आहे. त्यांना उपसभापतिपदावरून हटवावे, यासाठी विशेष सभा बोलावण्याची मागणी करत आहोत.

यापूर्वीचे धक्के

सभापती राम शिंदे यांनी आमदार रोहित पवार यांच्या विरोधात सुरू केलेल्या मोहिमेत आत्तापर्यंत हा पाचवा धक्का दिलेला आहे. यापूर्वी कर्जत कृषी उत्पन्न बाजार समिती, नगरपालिका, खरेदी-विक्री संघ, कर्जत दूध संघ, त्यानंतर आता जामखेड बाजार समितीमध्ये धक्का दिला गेला आहे.