नाशिक पदवीधर मतदारसंघ निवडणुकीत डॉ. सुधीर तांबेंची हॅटट्रीक

सोमवारी सकाळी ८ वाजता अंबड येथील सेंट्रल वेअर हाऊस येथे मतमोजणीस सुरुवात झाली. मतमोजणीच्या पहिल्या टप्प्याला दुपारी ३ वाजता सुरुवात झाली. तर सायंकाळी ७ वाजता पहिल्या फेरीत डॉ. तांबेंना १७ हजार ७१७ मते मिळाली. डॉ. प्रशांत पाटील यांना ८ हजार ५० मते मिळाली. तर डाव्या आघाडीचे उमेदवार राजू देसले यांना ३८७ मते मिळाली. एकूण मतांपैकी ३०७३ मते बाद ठरवण्यात आली. तर इतर १५ उमेदवारांना ७८३ मते मिळाली. पहिल्याच फेरीत डॉ. तांबे यांनी डॉ. पाटील यांच्याविरुद्ध ९ हजार मतांची आघाडी घेतली.
पदवीधर मतदारसंघाची मतमोजणी प्रक्रिया क्लिष्ट असल्याने मतमोजणी संथपणे सुरू होती. मतमोजणीच्या चौथ्या टप्प्यात डॉ. तांबे यांना ६५ हजार १८५ व डॉ. पाटील यांना ३१ हजार ७९६ मते प्राप्त झाली. डॉ. तांबे यांनी या टप्प्यामध्ये ३३ हजार ३८९ मतांची निर्णायक आघाडी घेतल्याने निवडणुकीचा कौल स्पष्ट होत गेला.
यावेळी डॉ. तांबे यांचे समर्थक व पक्ष कार्यकर्त्यांनी मतदान केंद्राबाहेर गर्दी केली होती. त्यांच्या नावाची घोषणा होताच समर्थकांनी फटाक्यांची आतषबाजी करत जल्लोष केला.