रहस्य, गूढ, तपास, संकंटाशी कायम चाललेली चकमक आणि कोडं सोडवण्यासाठी बनेशची धडपड या सर्व गोष्टी ‘फास्टर फेणे’ या चित्रपटाच्या ट्रेलरमध्ये पाहायला मिळतात. अमेय वाघची प्रमुख भूमिका असलेला हा चित्रपट त्याच्या पहिल्या झलकपासून प्रेक्षकांची चित्रपटाविषयीची उत्सुकता वाढवतोय. हा ट्रेलर पाहून प्रेक्षकांची उत्सुकता शिगेला पोहोचेल हे नक्की.
अमेय वाघसोबत दिलीप प्रभावळकर, अभिनेत्री पर्ण पेठे आणि ‘हाफ तिकीट’ फेम बालकलाकार शुभम मोरे यांचीही झलक या ट्रेलरमध्ये पाहायला मिळत आहे. चोरी, हत्या यांसारख्या घटनांच्या रहस्यांवरील पडदा हटवण्यासाठी बनेश उर्फ फास्टर फेणेची चाललेली धडपडही यात पाहायला मिळते. ‘झी स्टुडिओज’ने त्यांच्या अधिकृत फेसबुक अकाऊंटवर हा ट्रेलर पोस्ट केला आहे. ‘सुरुवात सोडू नका, शेवट चुकवू नका,’ असं कॅप्शन या ट्रेलरला देण्यात आलं आहे.
वाचा : तैमुरला ‘हे’ पदार्थ आवडतात
अनेकांनी बालपणी मे महिन्याच्या सुट्टीत ‘फास्टर फेणे’ची सचित्र रोमहर्षक पुस्तके अनेकांनीच वाचली असतील. प्रसिद्ध लेखक भा. रा. भागवत यांचे हे पात्र प्रचंड लोकप्रिय झालं होतं. फास्टर फेणेच्या या रंजक कथा दिग्दर्शक आदित्य सरपोतदार चित्रपटाच्या स्वरुपात घेऊन येत आहेत. रितेश देशमुखची पत्नी जेनेलिया देशमुख आणि मंगेश कुलकर्णी हे या चित्रपटाचे निर्माते आहेत. आता अमेय वाघ फास्टर फेणेच्या रुपात प्रेक्षकांना किती आवडतोय हे पाहणं औत्सुक्याचं ठरेल. २७ ऑक्टोबर रोजी हा चित्रपट प्रेक्षकांच्या भेटीला येतोय.