सहकाऱ्याची हत्या करणाऱ्यास उत्तर प्रदेशातून अटक

देवनार येथे आपल्या सहकाऱ्याची हत्या करून फरारी झालेल्या आरोपीला पोलिसांनी उत्तर प्रदेशातून अटक केली. मोहन चौरसिया असे या आरोपीचे नाव आहे. देवनार येथील एका रसवंतीगृहात चौरसिया आणि शमशेर अन्सारी हे दोघे काम करत होते. चौरसियाला गावी जायचे होते. त्यासाठी त्याने मालकाकडे पैसे मागितले होते. परंतु मालकाने पैसे न दिल्याने त्याने दुकानात चोरी करण्याचा निर्णय घेतला होता. गेल्या शुक्रवारी रात्रीच्या वेळी तो दुकानातून चोरी करत असताना अन्सारीने त्यास विरोध केला.यावेळी झालेल्या भांडणातून चौरसियाने अन्सारीची गळा दाबून हत्या केली. त्यानंतर चौरसिया उत्तर प्रदेशात आपल्या गावी पळून गेला होता. देवनार पोलिसांनी तेथे जाऊन त्याला अटक केली.