Lakme Fashion Week 2018: जत्रा अनोख्या फॅशनची

वर्षांतून दोनदा होणारा लॅक्मे फॅशन शो हा देशातल्या फॅशन शोजमधला सगळ्यात नामांकित फॅशन शो आहे. लॅक्मे फॅशन वीक आला म्हणजे सेलिब्रेटींच्या चाहत्यांना आठवडाभराची मेजवानीच असते. मोठमोठय़ा डिझायनर्सच्या कपडय़ांचं शोकेसिंग आठवडाभर मोठय़ा दिमाखात सादर होत असतं.झगमगत्या दुनियेचं आकर्षण प्रत्येकालाच असतं आणि त्यातही आपल्या आवडत्या सेलिब्रेटींना जवळून पाहण्याची संधी रॅम्पवर होणाऱ्या फॅशन शोजमधून मिळते. पहिल्या दिवशी रॅम्पवर अभिनेत्री हुमा कुरेशी आणि अभिनेता साकिब सलीम यांची जादू पाहायला मिळाली. बदलणाऱ्या फॅशनची चाहूल घ्यायची तर ‘लॅक्मे फॅशन वीक’ला पर्याय नाही. कपडे, रंग, फॅशन डिझायनर्सची सर्जनशीलता आणि त्यांच्या कल्पक डोक्यातून अवतरलेले फॅशनेबल कपडे त्यांच्यापेक्षा दुप्पट आत्मविश्वासाने परिधान करून रॅम्पवर टेचात वावरणाऱ्या मॉडेल्स.. असा रंगारंग देखणा सोहळा असतो. भारतातल्या फॅशन शोजमधला सर्वात नामांकित फॅशन शो म्हणजे लॅक्मे फॅशन वीक.या लॅक्मे फॅशन वीकचे वर्षांतून दोन सीझन होतात. एक म्हणजे समर रिसॉर्ट आणि दुसरा विंटर फेस्टिव्हल. ‘लॅक्मे फॅशन वीक’कडे फक्त फॅशन इंडस्ट्रीचेच नाही तर पूर्ण जगाचे लक्ष असते. या इंडस्ट्रीत नव्याने पाय रोवू पाहणाऱ्या प्रत्येक फॅशन डिझायनरला हा फॅशन वीक खुणावत असतो. वर्षांतून दोनदा होणाऱ्या या फॅशन शोसाठी दर वर्षी नवीन डिझायनर्सना संधी दिली जाते.