जगभरात इंस्टाग्रामची मेसेज सेवा ठप्प झाली आहे. मेसेज करताना अनेकांना अडचणींचा सामना करावा लागतो आहे. सायंकाळी ५ वाजतापासून ही सेवा ठप्प असल्याची माहिती आहे. महत्त्वाचे भारतातही अनेकांना याचा फटका बसला आहे. हजारो वापरकर्त्यांनी एक्स या समाज माध्यमावर पोस्ट करत यासंदर्भात तक्रार केली आहे.
न्यूज १८ ने डाऊनडिटेक्टरच्या हवाल्याने दिलेल्या माहितीनुसार, आज सायंकाळपासून इंस्टाग्रामच्या वापरकर्त्यांना मेसेज करताना अडचणी येत आहेत. जवळपास पाच हजार वापरकर्त्यांनी यासंदर्भात तक्रार केली आहे. यामध्ये अमेरिका, इंग्लंडसह भारतातील काही वापरकर्त्यांचा समावेश आहे. एक्स या समाज माध्यमावर पोस्ट त्यांनी त्यांच्या भावना व्यक्त केला आहेत.
भारतात सांयकाळी ६ वाजताच्या सुमारास १५५० तक्रारी नोंदवल्या गेल्या आहेत. तर अमेरिकेत ९०० तसेच इंग्लंडमध्ये २३०० तक्रारी नोंदवल्या गेल्या आहेत. दरम्यान, या मागचं कारण अद्याप अस्पष्ट असून यासंदर्भात इंस्टाग्रामकडून अद्याप कोणतीही अधिकृत प्रतिक्रिया आलेली नाही.
महत्त्वाचे म्हणजे अशाप्रकारे इंस्टाग्राम डाऊन होण्याची ही महिनाभरातील दुसरी घटना आहे. या महिन्याच्या सुरुवातीला ८ ऑक्टोबर रोजी अशाचप्रकारे इंस्टाग्राम डाऊन झाल्याचं बघायला मिळालं होतं. त्यावेळीही हजारो वापरकर्ते वैतागले होते. त्यांना ॲपमध्ये प्रवेश करण्यात अडचण येत होती. त्यानंतर #instagramdown हा हॅशटॅग मोठ्या प्रमाणात ट्रेंड झाला होता.
© IE Online Media Services (P) Ltd