धुळ्यातील स्वस्त धान्य दुकानदारांचाही ‘बंद’

प्रलंबित मागण्यांकडे केंद्र व राज्य शासनाकडून दुर्लक्ष होत असल्याच्या निषेधार्थ देशभरातील स्वस्त धान्य दुकानदार ११ डिसेंबर रोजी बंद पाळणार असून त्यात धुळ्याचे दुकानदारही सहभागी होणार असल्याची माहिती ऑल इंडिया फेअर प्राइस शॉप डिलर्स फेडरेशनचे राष्ट्रीय सदस्य आणि प्रांत उपाध्यक्ष महेश घुगे यांनी येथे स्वस्त धान्य दुकानदारांच्या सभेत दिली.
सक्षम यंत्रणा न उभारता शासन सदोष योजना राबविण्याची घाई करीत आहे. सर्वोच्च न्यायालयाच्या निर्देशानुसार गठीत करण्यात आलेल्या न्यायमूर्ती वधवा समितीच्या सूचनांकडे दुर्लक्ष करीत आहे. त्याचा विरोध करण्यासाठी आणि इतर प्रलंबित मागण्यांकडे शासनाचे लक्ष वेधण्यासाठी हे आंदोलन करण्यात येत आहे.
आंदोलनाचा एक भाग म्हणून ११ डिसेंबरला सकाळी ११ वाजता गांधी पुतळ्यापासून जिल्हाधिकारी कार्यालयावर स्वस्त धान्य दुकानदारांचा मोर्चा संघटनेचे प्रांत उपाध्यक्ष महेश घुगे यांच्या नेतृत्वाखाली काढण्यात येणार आहे.
या मोर्चात सहभागी होण्याचे आवाहन संघटनेचे सचिव संतोष जैन व पदाधिकारी सुभाष कोटेचा, मुरलीधर नागोमती, प्रमोद बडगुजर, सुनील भावसार आदींनी केले आहे.