अदानी समूहाचे १.३ लाख कोटींच्या भांडवली गुंतवणुकीचे नियोजन

सध्या समूहाचे १० गिगावॉट वीजनिर्मितीची क्षमता असलेले अपारंपरिक ऊर्जा प्रकल्प आहेत. त्यात सौरऊर्जा आणि पवनऊर्जा प्रकल्पांचा समावेश आहे. समूहाकडून दरवर्षी स्थापित क्षमतेत ६ ते ७ मेगावॉटची भर घालण्यात येणार असून, २०५० पर्यंत ५० मेगावॉट क्षमतेपर्यंत पोहोचण्याचे उद्दिष्ट आहे. एक मेगावॉट क्षमतेचा ऊर्जा प्रकल्प उभारण्यासाठी ५ कोटी रुपयांची गुंतवणूक करावी लागते. त्यामुळे २०३० पर्यंत समूहाला २ लाख कोटी रुपयांची गुंतवणूक करावी लागणार आहे, अशी माहिती अदानी ग्रीन एनर्जीचे कार्यकारी संचालक सागर अदानी यांनी दिली.

हेही वाचा >>> Stock Market Today : ७८ हजारांचे शिखरही सर

अदानी समूहाकडून चालू आर्थिक वर्षात १.३ लाख कोटी रुपयांची गुंतवणूक समूहातील कंपन्यांत करण्यात येणार आहे. समूहाने पुढील ७ ते १० वर्षांत कंपन्यांमध्ये १०० अब्ज डॉलरची गुंतवणूक करण्याचे उद्दिष्ट आखले आहे, अशी माहिती अदानी समूहाचे मुख्य कार्यकारी अधिकारी जुगेशिंदर रॉबी सिंग यांनी मंगळवारी दिली.

सिंग म्हणाले की, अदानी समूहातील बंदर ते ऊर्जा, विमानतळ, कमोडिटी, सिमेंट व माध्यम क्षेत्रातील कंपन्यांत गुंतवणूक केली जाईल. यापैकी काही गुंतवणूक अंतर्गत गंगाजळीतून, तर उर्वरित निधी कर्जरूपाने उभारला जाईल. यंदा मुदत संपत असलेल्या ३ ते ४ अब्ज डॉलरच्या कर्जाची पुनर्रचना करण्याचा समूहाचा विचार आहे. यातून प्रकल्प अर्थसाहाय्यासाठी १ अब्ज डॉलरचा निधी उभा केला जाईल. बरोबरच २ ते २.५ अब्ज डॉलर समभाग विक्री करून मिळविले जातील. यंदा प्रकल्प पूर्णत्वावर भर दिला जाणार आहे, असे सांगून सिंग म्हणाले की, अपारंपरिक ऊर्जा क्षेत्रातील अदानी ग्रीन कंपनी ६ ते ७ मेगावॉटचा प्रकल्प पूर्ण करेल.