रुपयाच्या अवमूल्यनामुळे परदेशातून कर्ज उभारणी महाग

वर्ष २०२२ मध्ये भारतीय कंपन्यांनी परदेशातून १४.३८ अब्ज डॉलरचे कर्ज उभारले होते. त्या तुलनेत वर्ष २०२३ मध्ये ते दुपटीने वाढले आणि एका दशकातील ती सर्वाधिक वाढ होती. डॉलरच्या तुलनेत भारतीय रुपया घसरत असल्याने, भारतीय कंपन्यांना परदेशातून ज्यादा दराने कर्ज उभारावे लागत आहे. शिवाय कर्जावरील व्याज परतफेडीचा आणि जोखीम खर्चही वाढणार आहे.

हेही वाचा >>> डिसेंबरमध्ये देशाच्या निर्यातीत घसरण; नेमके कारण काय?

डॉलरच्या सशक्ततेमुळे फारच कमी कंपन्या परदेशातून कर्ज उभारणीचा पर्याय निवडतील. अनेक भारतीय कंपन्यांनी आता कर्जासाठी स्थानिक बँकांकडे मोर्चा वळवला आहे. चांगले मानांकन प्राप्त असलेल्या कंपन्यांसाठी स्थानिक आणि परकीय चलनातील कर्जांच्या दरातील फरक आता सुमारे २००-२५० आधारबिंदू आहे, असे आघाडीचे आर्थिक सल्लागार प्रबल बॅनर्जी म्हणाले.

डॉलरच्या तुलनेत रुपयातील घसरण तीव्र झाली असून सप्टेंबर २०२४ ते १४ जानेवारी २०२५ या कालावधीत डॉलरच्या तुलनेत तो ४.४ टक्क्यांनी घसरला आहे. तर विद्यमान वर्षात त्यात १०० पैशांहून अधिक घसरण झाली आहे.