मुंबई : देशातील सर्वात मूल्यवान कंपनी असलेल्या रिलायन्स इंडस्ट्रीजचा निव्वळ नफा डिसेंबरअखेर समाप्त तिमाहीत १०.९ टक्क्यांनी वधारून १९,६४१ रुपयांवर गेला आहे. गेल्यावर्षी याच तिमाहीत कंपनीने १५,७९२ कोटी रुपयांचा निव्वळ नफा नोंदवला होता, तर आधीच्या म्हणजेच सप्टेंबर तिमाहीत कंपनीचा नफा १७,३९४ कोटी रुपये होता.
कंपनीचा एकूण महसूल ३.२ टक्क्यांनी वाढून २.४८ लाख कोटी रुपयांवर पोहोचला आहे, जो मागील वर्षीच्या कालावधीत २.४१ लाख कोटी रुपये होता. तर व्याज, कर, घसारा आणि कर्जमाफीपूर्वी एकत्रित कमाई एका वर्षापूर्वीच्या तुलनेत १६.७ टक्क्यांनी वाढून ४४,६७८ कोटींवर पोहोचली आहे. रिलायन्स इंडस्ट्रीज समूहाचा अनेक क्षेत्रात व्यवसाय विस्तार आहे. त्यात ऊर्जा, पेट्रोकेमिकल्स, रिटेल आणि टेलिकम्युनिकेशन्स या क्षेत्रांचा समावेश आहे.
हेही वाचा >>> ‘आयपीओ’साठी अप्लाय करताय? सेबीच्या अध्यक्षा काय म्हणताय ते वाचा
याचवेळी समूहातील रिलायन्स रिटेल कंपनीने तिसऱ्या तिमाहीत ६,२७१ रुपयांचा नफा नोंदविला आहे. मागील वर्षीच्या तुलनेत त्यात ३१ टक्के वाढ झाली आहे. तसेच तेल आणि रसायने व्यवसाय १३,९२६ कोटींवरून वाढून १४,०६४ कोटी झाला आहे.
जिओला ५,२०८ कोटींचा नफा
दूरसंचार व डिजिटल व्यवसाय एकवटलेल्या रिलायन्स जिओला सरलेल्या तिमाहीत ५,२०८ कोटींचा निव्वळ नफा झाला आहे. गेल्या वर्षीच्या तिमाहीच्या तुलनेत त्यात १२.३ टक्क्यांची वाढ झाली आहे. तर कंपनीचा महसूल गेल्या वर्षीच्या तुलनेत १०.३ टक्क्यांनी वाढत २५,३६८ कोटी रुपयांवर पोहोचला आहे. यादरम्यान डिसेंबर २०२३ च्या तिमाहीत जिओच्या ग्राहकांची संख्या १.१२ कोटींनी वाढून ४७ कोटींवर पोहोचली आहे.
रिलायन्सने चालू आर्थिक वर्षाच्या तिसऱ्या तिमाहीत उत्कृष्ट कामगिरी केली आहे, जी तिमाही निकालातून प्रतिबिंबित झाली आहे. आमच्या सर्व व्यवसायांनी पुन्हा एकदा विक्रमी कामगिरीची नोंद केली आहे. – मुकेश अंबानी, अध्यक्ष, रिलायन्स इंडस्ट्रीज लिमिटेड