नीचांकी पातळीवरून रुपया ८ पैशांनी सावरला

देशांतर्गत आघाडीवर किरकोळ महागाई दरात घसरणीच्या दिलासादायी आकडेवारीमुळे भांडवली बाजार देखील सलग चार सत्रातील पडझडीतून सावरल्याने रुपयाला आधार मिळाला. स्थानिक चलन बाजारात, रुपयाने ८६.५७ पातळीवरून व्यवहाराला सुरुवात केली. दिवसभरातील सत्रात त्याने ८६.४५ या उच्चांकाला स्पर्श केला आणि नंतर दिवसाच्या शेवटी ८६.६२ प्रति डॉलर पातळीवर तो बंद झाला, त्याच्या मागील बंद किमतीपेक्षा त्यात ८ पैशांनी वाढ नोंदवण्यात आली.

हेही वाचा >>> वैयक्तिक प्राप्तिकरातील वाढ अर्थव्यवस्थेसाठी वरदान; प्रत्यक्ष कर संकलन १२ जानेवारीपर्यंत १६.९० लाख कोटींवर

सोमवारच्या सत्रात, रुपयाने दोन वर्षांतील सर्वात मोठी घसरण नोंदवली आणि सत्राच्या शेवटी अमेरिकन डॉलरच्या तुलनेत ६६ पैशांनी घसरून तो ८६.७० या ऐतिहासिक नीचांकी पातळीवर बंद झाला होता. याआधी ६ फेब्रुवारी २०२३ रोजी रुपयाने डॉलरच्या तुलनेत एक सत्रात विक्रमी ६८ पैशांची घसरण अनुभवली होती.

हेही वाचा >>> घाऊक महागाई वाढली; अन्नधान्यांच्या किमतीमुळे नव्हे तर…; महागाई दर डिसेंबरमध्ये वाढून ….

पंधरवड्यात १०० पैशांनी घसरण

डॉलरच्या तुलनेत रुपया ३० डिसेंबर २०२४ रोजी ८५.५२ या पातळीवर बंद झाला होता. आता दोन आठवड्याच्या कालावधीनंतर त्यात १०० पैशांहून अधिक घसरण झाली आहे. १९ डिसेंबर २०२४ रोजी पहिल्यांदाच त्याने ८५ रुपये प्रति डॉलरचा टप्पा ओलांडला होता. डिसेंबर महिन्यांपासून रुपयाने तब्बल २ टक्क्यांचे अवमूल्यन सोसले आहे.

देशांतर्गत भांडवली बाजार सावरल्याने प्रबळ अमेरिकी डॉलरपुढे रुपयाला सार्वकालिक नीचांकी पातळीवरून सावरता आले. शिवाय किरकोळ महागाई कमी झाल्याने रुपयाच्या मूल्याला दिलासा मिळाला. मात्र खनिज तेलाच्या किमती वाढत्या राहिल्याने रुपया आणखी कमकुवत होण्याची भीती कायम आहे. ज्याचा एकंदर महागाईवर विपरित परिणाम होऊ शकेल. – अनुज चौधरी, संशोधन विश्लेषक, मिरे ॲसेट शेअरखान