यंदाच्या वर्षातील पहिले तीन महिने संपले तरीही शेअर बाजारातील गुंतवणुकीने गुंतवणूकदारांना फारसा दिलासा दिलेला नाही. याची मुख्य कारणे म्हणजे, अमेरिकेची वारंवार बदलणारी आर्थिक धोरणे आणि निर्बंध, बेरोजगारी, जागतिक बाजारपेठेतील अस्वस्थततेचे पडसाद आणि अर्थात परदेशी गुंतवणूकदारांचा विक्रीचा वाढता जोर अशी देता येतील.
शेअर बाजार निर्देशांकाप्रमाणेच ‘माझा पोर्टफोलियो’ची कामगिरीदेखील यथातथाच आहे. ४५,८३९ रुपयांच्या गुंतवणुकीचे २०७९ रुपये नफ्यासह (४.५ टक्के वाढ) ४७,९१८ रुपये झाले आहेत. म्हणजे पोर्टफोलिओचा आयआरआर (वार्षिक परतावा) १४.२७ टक्के आहे. याच काळातील मुंबई सेन्सेक्सचा आयआरआर ५.९१ टक्के आहे. जगभरातील सर्वच प्रमुख शेअर बाजारातदेखील प्रचंड अनिश्चितता असून त्याला सध्याचे व्यापारी युद्धाची परिस्थिती कारणीभूत आहे. सोने आणि चांदी मात्र अपेक्षेप्रमाणे तेजीत आहेत.
अर्थात शेअर बाजारातील किंवा म्युच्युअल फंडातील केवळ दीर्घकालीन गुंतवणूक फायद्याची ठरत असते, हे आत्तापर्यंतच्या अनुभवावरून सिद्ध झालेले आहे. या सदरातील शेअर हे नेहमीच मध्यम ते दीर्घकालीन गुंतवणुकीसाठी असल्याने त्यांचे लगेचच मूल्यमापन करणे योग्य ठरणार नाही. गुंतवणूकदारांनी सतर्क राहून गुंतवणूक केलेल्या कंपन्यांचे आर्थिक निकाल अभ्यासून बाजारातील घडामोडींवर लक्ष ठेवावे, तसेच वेळोवेळी नुकसान प्रतिबंध अथवा ‘स्टॉपलॉस’ पद्धत अवलंबून किंवा प्रसंगी नफा पदरात पाडून तोटा मर्यादित ठेवणे अपेक्षित आहे.
-अजय वाळिंबे
Stocksandwealth@gmail.com
माझा पोर्टफोलिओअंतर्गत सुचवलेल्या कंपनीच्या शेअर्समध्ये लेखकाची वा त्याच्या जवळच्या नातेवाईकांची (उपलब्ध माहितीप्रमाणे) कुठलीही गुंतवणूक नाही किंवा असल्यास ती कंपनीच्या भरणा झालेल्या भाग भांडवलाच्या १% पेक्षा कमी आहे. तसेच सुचवलेल्या कंपनीशी लेखकाचा कुठलाही संबंध नसून त्याने कंपनीकडून कुठलेही मानधन अथवा भेटवस्तू घेतलेली नाही. माझा पोर्टफोलियोअंतर्गत विवेचन केलेले शेअर्स हा आर्थिक सल्ला अथवा शिफारस नाही. लेखात सुचवलेल्या कंपनीचे संशोधन हे वाचकांच्या महितीसाठी असून, शेअरमधील गुंतवणूक वाचकांनी स्वत:च्या जोखमीवर अथवा सल्लागाराच्या सल्ल्याने करावी.