एपी, कीव्ह : युक्रेनच्या राजधानीत मध्यवर्ती भागात रशियाने गुरुवारी केलेल्या ड्रोन आणि क्षेपणास्त्र हल्ल्यात १२ जण ठार, तर ४८ जखमी झाले. स्थानिक प्रशासनाने ही माहिती दिली. युक्रेनवर रशियाने केलेला आतापर्यंतचा सर्वांत मोठा हवाई हल्ला होता.
रशिया-युक्रेन युद्ध थांबावे, यासाठी अमेरिकेच्या पुढाकाराखाली प्रयत्न सुरू आहेत. ते सुरू असताना रशियाने युक्रेनवर गेल्या काही आठवड्यांतील मोठा हल्ला केला. युक्रेनच्या हवाई दलाने दिलेल्या माहितीनुसार, रशियाने ५९८ ड्रोन आणि ३१ वेगवेगळ्या प्रकारची क्षेपणास्त्रे युक्रेनवर डागली. रशियाने केलेल्या हल्ल्यात कीव्हमधील जवळपास १०० इमारतींचे नुकसान झाले.
युक्रेनने रशियाची ५६३ ड्रोन आणि २६ क्षेपणास्त्रांना पाडल्याचे हवाई दलाने सांगितले. रशियाने आतापर्यंत केलेला हा सर्वांत मोठा हवाई हल्ला मानला जातो. मृतांमध्ये २, १४ आणि १७ वर्षांच्या तीन मुलांचा समावेश आहे. मृतांचा आकडा वाढण्याची शक्यता आहे. हल्ला झालेल्या ठिकाणी बचावकार्य वेगाने सुरू आहे.
रशियाच्या संरक्षण मंत्रालयाने सांगितले, की युक्रेनने डागलेली १०२ ड्रोन रशियाने पाडली आहेत. युक्रेनचे ड्रोन रशियामधील तेल रिफायनरींना लक्ष्य करीत आहेत. गुरुवारी युक्रेनने केलेल्या हल्ल्यात रशियातील दोन रिफायनरींना लक्ष्य केले. काही ठिकाणांहून धूर येताना दिसल्याचे स्थानिकांनी सांगितले.
रशियाने चर्चेऐवजी बॅलिस्टिक क्षेपणास्त्रांची निवड केली आहे. जगामध्ये ज्यांनी ज्यांनी शांततेची हाक दिली आहे, त्यांनी आता बोलले पाहिजे. यातील बरेच जण आता तात्त्विक भूमिका घेण्याऐवजी मौन बाळगणेच पसंत करीत आहेत. वोलोदिमिर झेलेन्स्की, अध्यक्ष, युक्रेन