Andhra Pradesh Explosion : आंध्र प्रदेशातील एका फार्मा कंपनीत भीषण स्फोट; १५ जणांचा मृत्यू, ४० जण गंभीर जखमी

इंडिया टुडेच्या वृत्तानुसार, आंध्र प्रदेशातील अनकापल्ले जिल्ह्यातील एस्सियंटिया या फार्मास्युटिकल कंपनीत बुधवारी दुपारी भीषण स्फोट होऊन १५ जणांचा मृत्यू झाला. तर ४० पेक्षा जास्त जण गंभीर जखमी झाले आहेत. दुपारच्या जेवणावेळी कंपनीतील काही कामगार जेवणासाठी बाहेर गेले होते. मात्र, यावेळी ही घटना घडली. जेवणासाठी अनेक कामगार बाहेर गेल्यामुळे अनेकांचा जीव बचावला आहे.

हेही वाचा : Kolkata Crime : “डॉ. संदीप घोष बेवारस मृतदेह विकायचे, आणि..” आर. जी. कर रुग्णालयातील माजी अधिकाऱ्याचा धक्कादायक आरोप

दरम्यान, ही घटना घडल्यानंतर घटनास्थळावर तात्काळ रुग्णवाहिका दाखल होत जखमी झालेल्यांना रुग्णालयात दाखल करण्यात आलं. जखमी झालेल्या कामगारांवर उपचार सुरु असल्याची माहिती सांगण्यात येत आहे. फार्मा कंपनीत भीषण स्फोटाची घटना घडल्यानंतर कंपनीच्या परिसरात राखाडी धुराचे मोठमोठे लोट पसरले होते.

या घटनेनंतर स्थानिक प्रशासनाकडून मदत आणि बचावकार्य सुरू आहे. दरम्यान, एस्सियंटिया या फार्मास्युटिकल कंपनीत आधी भीषण स्फोट झाला आणि त्यानंतर मोठ्या प्रमाणात आग लागली. त्यामुळे कर्मचाऱ्यांमध्ये घबराट पसरली होती. तसेच आपला जीव वाचवण्यासाठी कामगारांनी कंपनीच्या बाहेर धाव घेत आपला जीव वाचवला. सध्या कंपनीला लागलेली आग विझवण्यासाठी अग्निशमन दलाच्या अनेक गाड्या घटनास्थळी दाखल झाल्या आहेत. तसेच अग्निशमन दलाचे जवान आणि पोलिसांकडून मदत कार्य सुरु असून कंपनीत अडकलेल्या कामगारांची सुटका करण्यात येत आहे.