कन्नड अभिनेत्री रान्या रावला बंगळुरूच्या कॅम्पेगौडा आंतरराष्ट्रीय विमानतळावर अटक करण्यात आली. सोन्याची तस्करी केल्याच्या प्रकरणात पोलिसांनी ही कारवाई केली. अभिनेत्रीची झडती घेतल्यानंतर तिच्याकडून १४.८ किलो सोनं जप्त करण्यात आल्याची माहिती आहे. या सोन्याची किंमत १२ कोटी रुपये आहे. रान्या रावच्या अटकेमुळे चित्रपटसृष्टीत एकच खळबळ उडाली आहे. रान्या १५ दिवसांत चारवेळा दुबईला गेली होती. त्यामुळे तिच्यावर संशय आला. रान्या राव पकडली कशी गेली आपण जाणून घेऊ.
रान्या रावच्या वडिलांनी या घटनेशी आपला काही संबंध नाही असं म्हटलं आहे
रान्या रावचे वडील आयपीएस अधिकारी आहेत. तिच्याकडे जे सोनं मिळालं आहे ती घटना बंगळुरुतली मोठी जप्ती म्हणून पाहिलं जातं आहे. मंगळवारी रात्री कारवाई झाल्यानंतर पोलीस आता हा शोध घेत आहेत की रान्या राव बरोबर सोन्याच्या तस्करीत आणखी कुणाचा सहभाग आहे? या प्रकरणी पोलीस तिची चौकशी करत आहेत.
रान्या राव पोलिसांच्या रडारवर कशी आली?
रान्या रावने मागच्या वर्षभरात गल्फ देशांमधल्या १० तरी फेऱ्या केल्या आहेत. तसंच मागच्या १५ दिवसांत ती चार वेळा दुबईला जाऊन आली. त्यामुळे ती तपास यंत्रणांच्या रडारवर आली. रान्या राववर पोलिसांना संशय आलाच होता. त्यानंतर तिच्यावर नजर ठेवण्यात आली. रान्या मंगळवारी जेव्हा दुबईहून बंगळुरुला पोहचली तेव्हा तिला पोलिसांनी आणि तपास यंत्रणांनी थांबवलं. तिच्या झडतीत पोलिसांना सगळं घबाड सापडलं. असंही सांगितलं जातं आहे की एका पोलीसाच्या मदतीने तिने हे सगळं घडवलं. कारण तो पोलीस कॉन्स्टेबल तिला विमानतळातून बाहेर पडण्यासाठी मदत करायचा. एवढंच नाही तर जतीन हुक्केरी हा रान्याचा पती आहे. तो प्रतिथयश आर्किटेक्ट आहे. त्याचं किंवा त्याच्याशी संबंधित कुणाचंही काम दुबईत सुरु नाही अशीही माहिती पोलिसांना मिळाली ज्यामुळे रान्या दुबईत तस्करीसाठी जात असावी असा संशय पोलिसांना आला. इंडिया टुडेच्या वृत्तानुसार रान्याने तिच्या कपड्यांच्या आतून मांड्या, कंबर या ठिकाणी सोनं लपवलं होतं. एक माहिती अशीही समोर येते आहे की तिने दुबईच्या साधारण ३० फेऱ्या केल्या आहेत. यावेळी मात्र ती पकडली गेली. ज्यानंतर तिच्याकडे १२ कोटी सोनं आढळून आलं आहे. जे ज्पत करण्यात आलं आहे आणि तिला अटक करण्यात आली आहे.
कोण आहे रान्या राव?
३३ वर्षीय रान्या राव ही दाक्षिणात्य चित्रपटसृष्टीतील लोकप्रिय अभिनेत्री आहे. तिने कन्नड आणि तामिळ भाषेतील अनेक चित्रपटांमध्ये काम केलं आहे. हिंदुस्तान पोस्टने दिलेल्या वृत्तानुसार, रान्या रावचे सावत्र वडील के रामचंद्र राव हे वरिष्ठ आयपीएस अधिकारी आहेत. सध्या ते कर्नाटक राज्य पोलिस दलात महासंचालक म्हणून कार्यरत आहेत. रान्या रावचा जन्म कर्नाटकातील चिकमंगलूर या गावात झाला. तिने आपलं प्राथामिक आणि माध्यमिक शिक्षण बेंगळुरूमधून पूर्ण केलं. सिनेसृष्टीत पाऊल ठेवण्याआधी रान्याने अभियांत्रिकीचे शिक्षण घेतलं. २०१४ मध्ये रान्या रावने ‘मानिक्य’ या प्रसिद्ध कन्नड चित्रपटातून सिनेसृष्टीत पाऊल ठेवलं. तिने अभिनेता सुदीपबरोबर चित्रपटात मुख्य अभिनेत्रीची भूमिका साकारली होती. प्रेक्षकांनी या चित्रपटाला भरभरून प्रतिसाद दिला, ज्यामुळे अत्यंत कमी वेळात तिला मोठी लोकप्रियता मिळाली.
© IE Online Media Services (P) Ltd