“…तर तुमची खैर नाही”, इराणचा अरब व अमेरिकेच्या मित्र राष्ट्रांना इशारा; इस्रायलचा उल्लेख करत म्हणाले…

वॉल स्ट्रीट जर्नलने अधिकाऱ्यांच्या हवाल्याने एक वृत्त प्रसिद्ध केलं आहे. यामध्ये त्यांनी म्हटलं आहे की इराणने अरब राष्ट्रांना व शेजाऱ्यांना इशारा दिला आहे की त्यांची जमीन व हवाई हद्द इराणवर हल्ला करण्यासाठी, अमेरिका किंवा इस्रायली वायूदलाला वापरण्यास देऊ नये. आमच्याविरोधातील कारवायांना अप्रत्यक्ष मदत केल्यास तुमची खैर नाही, अशा शब्दांत इराणने इशारा दिला आहे.

हे ही वाचा >> हेच खरे हिरो! १४१ प्रवाशांना विमानात तांत्रिक बिघाडानंतरही सुखरूप खाली उतरवणाऱ्या वैमानिकांवर कौतुकाचा वर्षाव; पाहा VIDEO!

दरम्यान, इराणच्या या धमकीचे परिणाम देखील दिसू लागले आहेत. अमेरिकन संरक्षण अधिकाऱ्यांचा हवाला देत वॉल स्ट्रीट जर्नलने वृत्त प्रसिद्ध केलं आहे की मध्य पूर्वेतील अमेरिकेच्या मित्र राष्ट्रांनी म्हटलं आहे की इराणवर कोणत्याही प्रकारच्या हल्ल्यासाठी इस्रायल किंवा अमेरिकेला ते त्यांची जमीन किंवा हवाई हद्द वापरू देणार नाहीत. इराणने १ ऑक्टोबर रोजी इस्रायलवर २०० क्षेपणास्रं डागली होती. त्यानंतर मध्य पूर्वेत तणाव निर्माण झाला आहे. इराणसह अमेरिकेलाही भिती आहे की इस्रायल संतापाच्या भरात इराणमधील तेलविहिरी किंवा अणुभट्टीवर हमला करू शकतो.

हे ही वाचा >> इस्रायलचा लेबनॉनमधील संयुक्त राष्ट्रांच्या चौकीवर हल्ला; परराष्ट्र मंत्रालयाने दिली तीव्र प्रतिक्रिया; म्हणाले, “प्रत्येक देशाने…”

इराणने इस्रायलला डिवचल्यामुळे तणाव वाढला?

इस्रायलच्या हेझबोलाविरोधी कारवाईस निषेधात्मक प्रत्युत्तर म्हणून इराणने १ ऑक्टोबर रोजी इस्रायलवर १८० बॅलिस्टिक क्षेपणास्त्रांचा मारा केला. या माऱ्याने इस्रायलचं फारसं नुकसान झालं नाही. तरी एप्रिल महिन्यात इराणकडून झालेल्या अग्निबाण आणि ड्रोन वर्षावापेक्षा हा हल्ला अधिक सुनियोजित आणि गंभीर होता. या हल्ल्यास प्रत्युत्तर देण्याचा इरादा इस्रायलने जाहीर केला आहे. त्यामुळे येथून पुढे इराण आणि इस्रायल या कट्टर शत्रूंमध्ये थेट संघर्षाची दाट शक्यता वर्तवली जात आहे.