मलेशियामध्ये दोन लष्करी हेलिकॉप्टरची हवेमध्ये भीषण धडक झाल्याची घटना घडली आहे. या घटनेत १० जणांचा मुत्यू झाल्याची माहिती समोर येत असून घटनेचा व्हिडिओही समोर आला आहे. मलेशियामध्ये रॉयल मलेशियन नेव्हीचा वार्षिक कार्यक्रम होता. या कार्यक्रमासाठी लष्करी तालीम सुरु होती. याच दरम्यान ही दुर्देवी घटना घडली.
हवेतमध्ये झालेल्या लष्कराच्या दोन हेलिकॉप्टरच्या धडकेमध्ये १० जणांचा मृत्यू झाला आहे. तसेच या दुर्घटनेमध्ये मृत्यू झाल्याल्यांची ओळख पटवण्याचे काम सुरु असून त्यांचे मृतदेह लष्कराच्या रुग्णालयात पाठवण्यात आले आहेत. ही घटना मंगळवारी सकाळी ९.३० वाजताच्या दरम्यान मलेशियाच्या लुमुट नौदल तळावर घ़डली आहे.
मलेशियाच्या नौदलाने याबाबत एका निवेदनात सांगितले की, रॉयल मलेशियन नेव्हीच्या परेडदरम्यान ही घटना घडली. यासंदर्भातील वृत्त बीबीसी न्यूजने दिले आहे. या घटनेच्या व्हिडीओमध्ये असे दिसते की, लष्कराच्या काही हेलिकॉप्टरची परेड सुरु आहे. मात्र, यातील दोन हेलिकॉप्टरची हवेमध्ये धडक झाल्याचे दिसते आहे. त्यामुळे दोन्ही हेलिकॉप्टरचे रोटर कापले गेले आणि दोन्हीही हेलिकॉप्टर जमिनीवर कोसळले. दरम्यान, या घटनेची चौकशी होणार असून यासाठी समिती स्थापन करण्यात येणार असल्याची माहिती सांगितली जात आहे.