सीमेपलीकडील दहशतवादाला पाकिस्ताची गुप्तचर संस्था आयएसआयनेच निधी पुरवल्याचे दहशतवादी डेव्हिड हेडली याने न्यायालयाला दिलेल्या साक्षीमुळे स्पष्ट झाले आहे. त्यामुळे पाकिस्तानला ‘दहशतवादी राष्ट्र’ घोषित करण्यासाठी भारताने राजनैतिक प्रयत्न करावेत अशी मागणी भाजपने केली आहे.
आपल्या भूमीवरून सत्ताबाह्य़ केंद्रे कार्यरत असल्याचे सांगून पाकिस्तान आतापर्यंत स्वत:ची जबाबदारी झटकून टाकत होता. मात्र, पाकिस्तानमध्ये कुठलेही सत्ताबाह्य़ केंद्र नसून, दहशतवादी कारवायांमध्ये आयएसआयचाच हात असल्याचे हेडलीच्या साक्षीमुळे स्पष्ट झाले आहे, असे भाजपचे राष्ट्रीय सचिव सिद्धार्थ नाथ सिंग म्हणाले. तसेच पाकिस्तानला जागतिक स्तरावर एकटे पाडावे, अशी मागणी सिंग यांनी केली.