Russia-Ukrainian War donald trump volodymyr zelensky Conflict : युक्रेन व रशियामध्ये चालू असलेलं युद्ध रोखण्यासाठी अमेरिकेचे अध्यक्ष डोनाल्ड ट्रम्प यांनी प्रयत्न सुरू केले आहेत. याचाच भाग म्हणून युक्रेनचे अध्यक्ष वोलोदिमिर झेलेन्स्की यांनी शुक्रवारी (२८ फेब्रुवारी) व्हाउट हाऊसला (अमेरिकेच्या अध्यक्षांचं निवासस्थान व कार्यालय) भेट दिली होती. या भेटीदरम्यान अमेरिकेचे अध्यक्ष डोनाल्ड ट्रम्प यांच्याशी झेलेन्स्की यांची जोरदार बाचाबाची झाल्याचं पाहायला मिळालं. दोघांमध्ये संभाषण चालू असताना ट्रम्प यांनी अमेरिकेचे माजी अध्यक्ष जो बायडेन यांचा मूर्ख अध्यक्ष (Stupid President) असा उल्लेख केल्याचं पाहायला मिळालं. दरम्यान, ट्रम्प व झेलेन्स्की यांच्यातील वादाचा व्हिडीओ समाजमाध्यमांवर व्हायरल होत आहे. यावर जगभरातून प्रतिक्रिया येऊ लागल्या आहेत. युक्रेनचे शत्रूराष्ट्र म्हणजेच रशियाने देखील यावर प्रतिक्रिया दिली आहे.

आर्काइव्हमधील सर्व बातम्या मोफत वाचण्यासाठी कृपया रजिस्टर करा

रशियाने या बाचाबाची प्रकरणावर म्हटलं आहे की “झेलेन्स्की यांना जे मिळायला हवं होतं तेच मिळालं”. रशियाच्या परराष्ट्र मंत्रालयाने म्हटलं आहे, “आम्हाला प्रश्न पडला आहे की झेलेन्स्की ज्या पद्धतीने ट्रम्प यांच्याशी बोलत होते ते पाहून ट्रम्प यांनी झेलेन्स्की यांना मारण्यापासून स्वतःला कसं रोखलं?”

रशियाच्या परराष्ट्र मंत्रालयाच्या प्रवक्त्या मारिया जखारोव्ह यांनी टेलिग्रामवर एक पोस्ट केली आहे. या पोस्टमध्ये त्यांनी म्हटलं आहे की व्हाइट हाऊसमध्ये झेलेन्स्की ट्रम्प यांच्यासमोर असत्य कथन करत होते. त्यांची खोटी वक्तव्ये ऐकून ट्रम्प व उपाध्यक्ष जे. डी. व्हॅन्स यांनी झेलेन्स्की यांना मारलं कसं नाही याचं आम्हाला नवल वाटतंय. दुसऱ्या बाजूला रशियाचे माजी अध्यक्ष दिमीत्री मेदवेदेव यांनी देखील या घटनेवर त्यांची प्रतिक्रिया दिली आहे. मेदवेदेव म्हणाले, झेलेन्स्की व युक्रेनला ज्या गोष्टीची गरज होती तेच अमेरिकेने त्यांना दिलं आहे.

…अन् ट्रम्प झेलेन्स्कींवर संतापले

डोनाल्ड ट्रम्प यांची युक्रेनने कोणत्याही किंमतीत युद्ध रोखण्यासाठी तयार व्हावे अशी इच्छा होती, म्हणूनच त्यांनी झेलेन्स्की यांना अमेरिका दौऱ्यावर बोलावले होते. परंतु, झेलेन्स्की पुतिन यांच्याशी कोणत्याही प्रकारच्या तडजोडीसाठी तयार दिसत नव्हते. संभाषणादरम्यान, त्यांनी पुतिन यांना खुनी देखील म्हटलं. त्यांच्या या वर्तणुकीमुळे ट्रम्प खूप संतापल्याचं पाहायला मिळालं.

नॉर्वे युक्रेनच्या बाजूने

ट्रम्प आणि झेलेन्स्की यांच्यातील बाचाबाचीनंतर नॉर्वेचे पंतप्रधान जोनास गाहर स्टोरे यांनी युक्रेनला पाठिंबा दर्शवला आहे.

मराठीतील सर्व देश-विदेश बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App.
Web Title: Russia maria zakharova says its miracle how trump holding back from hitting zelenskyy oval office blow up asc