२६ वर्षांच्या शिक्षिकेवर विद्यार्थ्याने पेट्रोल फेकलं आणि तिला पेटवल्याची घटना घडली आहे. हा विद्यार्थी १८ वर्षांचा आहे असं सांगितलं जातं आहे. सूर्यांश असं या विद्यार्थ्याचं नाव आहे. या प्रकरणात कोतवाली पोलीस ठाण्यात तक्रार नोंदवण्यात आली आहे. मध्य प्रदेशातल्या नरसिंगपूर जिल्ह्यात कोतवाली पोलीस ठाण्यातल्या हद्दीत ही घटना घडली आहे. यानंतर या शिक्षिकेने या प्रकरणी तक्रार दाखल केली आहे.

पोलिसांनी या घटनेबाबत नेमकं काय सांगितलं?

पोलिसांनी दिलेल्या माहितीनुसार मंगळवारी दुपारी ३.३० च्या सुमारास ही घटना घडली. २६ वर्षीय शिक्षिका तिच्या घरी चालली होती. त्यावेळी सूर्यांश हा विद्यार्थी तिथे आला. त्याने बाटलीतून आणलेलं पेट्रोल या शिक्षिकेच्या अंगावर टाकलं आणि काडी पेटवली. या घटनेत या शिक्षिकीला १० ते १५ ठिकाणी भाजलं आहे. यानंतर या शिक्षिकेला तातडीने जिल्हा रुग्णालयात दाखल करण्यात आलं. तिच्यावर सध्या उपचार सुरु आहेत. डॉक्टरांनी दिलेल्या माहितीनुसार भाजल्याच्या या जखमा गंभीर आहेत पण शिक्षिकेच्या जिवाला धोका नाही.

दोन वर्षांपासून शिक्षिका आणि विद्यार्थी एकमेकांना ओळखत होते

पोलिसांनी दिलेल्या माहितीनुसार सूर्यांश आणि ही शिक्षिका एकमेकांना मागील दोन वर्षांपासून ओळखतात. सूर्यांश या शिक्षिकेच्या एकतर्फी प्रेमात पडला होता. १५ ऑगस्टला जी घटना घडली त्याचा राग सूर्यांशच्या मनात होता. त्या रागातून त्याने हे पाऊल उचललं.

१५ ऑगस्टला काय घडलं होतं?

१५ ऑगस्टच्या दिवशी २६ वर्षीय शिक्षिका शाळेत साडी नेसून आलली होती. त्यावेळी या विद्यार्थ्याने शिक्षिकेबाबत अश्लील भाषेत टिप्पणी केली होती. ज्यानंतर शिक्षिकेने त्याची तक्रार मुख्याध्यापकांकडे केली. यानंतर मुख्याध्यापकांनी त्याला फैलावर घेतलं आणि शाळेतून काढून टाकल्याचा निर्णयही सांगितला. ज्यानंतर चिडलेल्या सूर्यांशने शिक्षिकेवर पेट्रोल फेकलं आणि तिला पेटवलं.

शिक्षिका या घटनेत २० टक्के भाजली आहे, पोलिसांची माहिती

पोलिसांनी दिलेल्या माहितीनुसार सूर्यांश शिक्षिकेच्या घराजवळ पोहचला होता. शिक्षिकेला जेव्हा त्याने पेटवलं तेव्हा ती आराडाओरड करु लागली. शेजारुन जाणाऱ्या लोकांनी तिला वाचवलं आणि आग विझवली. या घटनेत शिक्षिका २० टक्के भाजली आहे पण तिच्या जिवाला धोका नाही असं डॉक्टरांनी सांगितलं आहे. एनडीटीव्हीने हे वृत्त दिलं आहे. या घटनेचा व्हिडीओ सोशल मीडियावर व्हायल झाला आहे. सोशल मीडियावर सदर आरोपीच्या विरोधात कठोरातली कठोर कारवाई व्हावी अशी मागणी होते आहे. एनडीटीव्हीने हे वृत्त दिलं आहे.