US Pauses Visas For Foreign Truck Drivers : भारत आणि अमेरिका यांच्यातील व्यापारी संबंध गेल्या काही दिवसांपासून तणावाचे बनले आहेत. यादरम्यान अमेरिकेतील ट्रम्प प्रशासनाने पुन्हा एकादा मोठा निर्णय घेतला आहे. ट्रम्प प्रशासनाने तत्काळ प्रभावाने सर्व व्यावसायिक ट्रक चालकांसाठी कामगार व्हिसा देणे थांबवले आहे. ही घोषणा परराष्ट्र व्यवहार मंत्री मार्को रुबिओ यांनी एक्सवर केली.

“अमेरिकेच्या रस्त्यांवर मोठ्या संख्येने परदेशी चालकांकडून चालवल्या जाणाऱ्या मोठ्या ट्रक्टर-ट्रेलर ट्रक्समुळे अमेरिकन लोकांचे जीव धोक्यात येत आहेत आणि अमेरिकन चालकांच्या उपजीविकेवर वाईट परिणाम होत आहे,” असे अमेरिकेचे परराष्ट्रमंत्री म्हणाले आहेत.

१२ ऑगस्ट रोजी फ्लोरिडा येथे एका अपघातात तीन लोकांचा मृत्यू झाला होता. हरजींदर सिंग या भारतीय चालकामुळे हा भीषण अपघात झाला होता. या अपघातानंतर हा चालक बेकायदेशीरपणे अमेरिकेत दाखल झाला होता असे समोर आले होते.

सिंग याने २०१८ मध्ये मेक्सिको येथून बेकायदेशीरपणे बॉर्डर ओलांडली होती आणि कॅलिफोर्निया येथे कमर्शियल ड्रायव्हर लायसन्स मिळवले होते, अशी माहिती फ्लोरिडा हायवे सेफ्टी अँड मोटार व्हेइकल्स (FLHSMV)च्या फ्लोरिडा विभागाने दिली आहे.

हा ड्रायवर बेदरकपणे आणि इतरांच्या सुरक्षेची काळजी न करता गाडी चालवत होता असे सांगितले जाते. परवानगी नसलेल्या भागात तो यू-टर्न घेण्याचा प्रयत्न करत होता आणि अपघात झाला. तेव्हापासून बेकायदेशीर स्थलांतरितांकडून होणाऱ्या अपघातात अमेरिकन नागरिकांचा मृत्यू होण्याच्या मुद्द्यावरून वादंग सुरू आहे.

होमलँड सेक्युरिटी विभागाने देखील या प्रकरणाची दखल घेतली असून त्यांनी जाहीर केले की, डोनाल्ड ट्रम्प यांच्या पहिल्या कार्यकाळादरम्यान सिंग याला वर्क परमिट नाकारण्यात आले होते , पण जो बायडन यांच्या प्रशासनात त्याने ते मिळवले.

हेही वाचा

कॅलिफोर्नियाचे गव्हर्नर अडचणीत

सिंग याला त्यांच्या राज्यात लायसन्स मिळाल्याने कॅलिफोर्नियाचे गव्हर्नर गॅविन न्यूसम हे देखील या राजकीय आरोप-प्रत्यारोपात अडकले आहेत. डीएचएस असिस्टंट सेक्रेटरी ट्रिशिया मॅग्लाग्लिन यांनी न्यूसम यांच्यावर टीका केली आहे. फ्लोरिडामध्ये तीन निष्पाप लोकांचा मृत्यू झाला कारण गॅविन न्यूसम यांच्या कॅलिफोर्निया डिपार्टमेंट ऑफ मोटार व्हेयकलने बेकायदेशीर व्यक्तीला कमर्शियल ड्रायव्हर्स लायसन्स दिले. या राज्यातील प्रशासनव्यवस्था व्यवस्था खराब आहे. अजून किती निष्पाप लोकांचा जीव गेला पाहिजे जेव्हा गॅविन न्यूसम हे अमेरिकन नागरिकांच्या सुरक्षिततेबाबत खेळणे बंद करतील? आम्ही पीडित आणि त्यांच्या कुटुंबांसाठी प्रार्थना करतो. सेक्रेटरी नोएम आणि डीएचएस हे नागरिकांच्या सुरक्षेसाठी आणि या गुन्हेगार बेकायदेशीर परदेशी लोकांना अमेरिकेतून बाहेर काढण्यासाठी चोवीस तास काम करत आहेत,” असे त्यांनी म्हटले आहे.

यादरम्यान सिंग याच्यावर खटला चालवण्यात आल्यानंतर त्याला डिपोर्ट केले जाईल, अशी घोषणा करण्यात आली आहे.