“इस्रायल-हमास युद्धापासून दूर राहा, नाहीतर…”, अमेरिकेचा इराणला इशारा; बायडेन म्हणाले, “आमची लढाऊ विमानं…”

दरम्यान, जगभरातल्या अनेक देशांनी इस्रायल किंवा पॅलेस्टाईनला पाठिंबा दर्शवला आहे. यापैकी अमेरिका इस्रायलच्या बाजूने उभी आहे. तर लेबनान आणि इराणमधून पॅलेस्टाईनला, हमासला मदत मिळत असल्याचं समोर आलं आहे. त्यामुळे अमेरिकेचे अधक्ष जो बायडेन यांनी इराणच्या भूमिकेवरून संताप व्यक्त केला. तसेच बायडेन यांनी इराणला हमास-इस्रायल वादात पडू नका असा इशारा दिला आहे. दुसऱ्या बाजूला ही युद्ध परिस्थिती हाताळण्यासाठी इस्रायलने मोठा निर्णय घेतला आहे. इस्रायलचे पंतप्रधान बेंजामिन नेतन्याहू आणि विरोधी पक्षनेते बेनी गॅंट्झ यांनी हमासच्या दहशतवाद्यांविरोधात लढण्यासाठी आपत्कालीन युद्ध सरकार स्थापन केलं आहे

अमेरिकेचे परराष्ट्रमंत्री अँटनी ब्लिंकन इस्रायलला जाणार आहेत. तर अमेरिकेचे अध्यक्ष जो बायडेन यांनी बुधवारी ज्यू नेत्यांची एक बैठक बोलावली होती. या बैठकीत बायडेन म्हणाले, आम्ही इस्रायलच्या दिशेने पाठवलेली आमची विमानं आणि युद्धनौका हा इराणसाठी संदेश आहे. कारण ते हमास आणि हिजबुल्लाहचं (लेबनानमधील दहशतवादी संघटना) समर्थन करतात.

हे ही वाचा >> विश्लेषण : हमासची युद्धशैली बदलत आहे का ?

बायडेन म्हणाले, हमासचा हा एक क्रूर हल्ला होता. तो दिवस (हल्ला झाला तो दिवस – ७ ऑक्टोबर) ज्यू समुदायासाठी काळा दिवस होता. आम्ही इस्रायली संरक्षण दलांना अतिरिक्त लष्करी सहाय्य पुरवत आहोत. तसेच या सैन्य तुकड्यांमध्ये वाढ केली जाईल. अमेरिका इस्रायलला दारू-गोळा पुरवत आहे. आम्ही पूर्व भूमध्य समुद्रात सैन्य आणि शस्त्रास्र वाहून नेणारी जहाजं तैनात करत आहोत. तसेच तिथे लढाऊ विमानं पाठवत आहोत. हा इराणसाठी सावधानतेचा इशारा आहे.