Alex Hales was injured after being hit by Spencer Johnson’s fast ball : आयपीएलच्या २०२४ हंगामासाठी १० कोटी रुपयांना विकल्या गेलेल्या ऑस्ट्रेलियाचा स्पेन्सर जॉन्सन बिग बॅश लीगमध्ये आपल्या गोलंदाजीने छाप पाडत आहे. बीबीएलमध्ये बुधवारी ब्रिस्बेन हीट आणि सिडनी थंडर्स यांच्यात सामना पार पडला. या सामन्यात स्पेन्सर जॉन्सन ब्रिस्बेन हीटसाठी चार षटकांत २४ धावांत दोन विकेट्स घेतल्या आणि संघाच्या विजयात महत्त्वपूर्ण योगदान दिले. सर्वोत्तम डावखुरा वेगवान गोलंदाज स्पेन्सरच्या एका चेंडूवर सिडनी संघाचा सलामीवीर ॲलेक्स हेल्स दुखापतग्रस्त होऊन खेळपट्टीवर कोसळला. ज्याचा व्हिडीओ व्हायरल झाला आहे.
ब्रिस्बेनमध्ये खेळल्या गेलेल्या या सामन्यात प्रथम फलंदाजी करताना ब्रिस्बेन हीट्स संघ १७.४ षटकांत १७२ धावा करून बाद झाला, परंतु त्यांनी २० षटकांत सिडनी थंडर्सला १५७ धावसंख्येवर रोखले. ज्यामुळे ब्रिस्बेन हीट्सने १५ धावांनी विजय मिळवला.ब्रिस्बेन हीटच्या १७२ धावांच्या लक्ष्याचा पाठलाग करताना सिडनी थंडर्सच्या डावाची सुरुवात कॅमेरून बॅनक्रॉफ्ट आणि ॲलेक्स हेल्स यांनी केली.
दरम्यान, जॉन्सनचा एक चेंडू वेगाने आत आला आणि ॲलेक्स हेल्सच्या पोटाच्या खालच्या भागावर आदळला. त्यामुळे हेल्स खेळपट्टीवर पडला. नंतर त्याने फलंदाजी केली पण तो आत्मविश्वासाने फलंदाजी करताना दिसला नाही. २८ धावा करून हेल्स मॅट कुहनेमनचा बळी ठरला. सिडनी थंडरसाठी, बॅनक्रॉफ्टने सर्वाधिक ४६ धावा केल्या. पण इतर फलंदाज मोठी इनिंग खेळू शकले नाहीत. त्यामुळे सिडनी थंडर्सचा डाव २० षटकांत १५७ धावांवर आटोपला.
हेही वाचा – AUS vs SA Test Series : नॅथन लायनने मोडला हरभजन आणि बेदीचा मोठा विक्रम, पाकिस्तानविरुद्ध केला खास पराक्रम
ब्रिस्बेन संघासाठी झेवियर बार्टलेटने सर्वाधिक तीन विकेट्स घेतल्या. त्याचबरोबर जॉन्सन आणि कुहनेमन यांनी प्रत्येकी दोन विकेट्स घेतल्या. ब्रिस्बेनच्या गोलंदाजांमध्ये स्पेन्सर जॉन्सनची गोलंदाजी शानदार राहीली, त्याने चार षटकात प्रति षटकात सहा धावा देत दोन विकेट्स घेतल्या.
या सामन्यात प्रथम फलंदाजी करताना ब्रिस्बेन हीटने नॅथन मॅकस्विनीच्या ५२ चेंडूत ७३ आणि जोश ब्राउनच्या ३९ धावांच्या जोरावर १७२ धावा केल्या होत्या. सिडनी थंडर्सच्या डॅनियल सॅम्सने चार षटकांत ३० धावांत पाच बळी घेतले, तर पाकिस्तानचा वेगवान गोलंदाज जमान खानने दोन बळी घेतले.