IND vs NZ: विराट कोहलीची विकेट पाहून अनुष्काने डोक्याला लावला हात, तर फिलिप्सचा कॅच पाहून मैदानावरील खेळाडूंनी… VIDEO व्हायरल

मॅट हेन्रीच्या सातव्या षटकातील चौथ्या चेंडूवर विराटने एक दणदणीत फटका खेळला, पण पापणी मिटते ना मिटते ग्लेन फिलिप्सने २३ मीटरवर अवघ्या ०.६२ सेंकदात एक अनपेक्षित झेल टिपला. विराटने ज्या धारदार पद्धतीने चेंडू मारला ते पाहून या चेंडूवर चौकार मिळणार याची सर्वांनाच खात्री होती, पण फिलिप्सने सर्वांच्याच आशांवर पाणी फेरलं.

फिलिप्सने चेंडू पकडल्यानंतर कोणाचाही यावर विश्वास बसत नव्हता. विराट कोहलीही क्षणभर थांबला. त्याला समजलंच नाही की नेमकं काय झालं. विराट कोहलीच्या विकेटचे आश्चर्य स्टेडियममध्ये बसलेल्या प्रेक्षकांमध्येही दिसले, ज्यांमध्ये अनुष्का देखील होती. मैदानावरील खेळाडूंनी तर फिलिप्सचा झेल पाहून अक्षरश: तोंडावर हात ठेवत आश्चर्य व्यक्त केले. तर फिलिप्सने झेल टिपल्यानंतर मोठ्याने हसत त्याचा आनंद साजरा केला.

विराटची विकेट पडल्यानंतर अनुष्काने आश्चर्याने डोकं धरल्याचा फोटो आणि व्हिडिओ सोशल मीडियावर व्हायरल झाला आहे. त्या फोटोंमध्ये ती हसत हसत चकित होत डोक्याला हात लावताना दिसत आहे. चकित झालेली असतानाही विराटच्या विकेटचं दु:ख स्पष्ट दिसत होती. यासह विराट कोहली आपल्या ३००व्या वनडेत १४ चेंडूंचा सामना करत ११ धावा करून बाद झाला.

विराट कोहलीची विकेट हा भारताला तिसरा धक्का होता. याआधी टीम इंडियाला पहिला धक्का शुबमन गिलच्या रूपाने तर दुसरा फटका रोहित शर्माच्या रूपाने बसला होता. ७ षटकांत भारताने अवघ्या ३० धावांत टॉप ऑर्डरच्या तीनही विकेट गमावल्या. पण नंतर श्रेयस अय्यर आणि अक्षर पटेलने भारताचा डाव सावरला.