बॅडमिंटन : सिंधू उपांत्य फेरीत

युवा बॅडमिंटनपटू पी. व्ही. सिंधूने मकाऊ ग्रां.प्रि. बॅडमिंटन स्पर्धेत उपांत्य फेरीत आगेकूच केली. स्पर्धेत भारताचे एकमेव प्रतिनिधी राहिलेल्या अव्वल मानांकित सिंधूने पाचव्या मानांकित हाँगकाँगच्या त्स्झ का चेनवर २१-१७, २१-१२ असा सरळ गेम्समध्ये विजय मिळवला. पहिल्या गेममध्ये दोघींमध्ये चुरशीचा मुकाबला रंगला. १७-१७ अशा बरोबरीच्या स्थितीतून सिंधूने सलग चार गुणांची कमाई करीत पहिला गेम नावावर केला. दुसऱ्या गेममध्ये चेनने आघाडी घेतली होती, मात्र सिंधूने ३-३ अशी बरोबरी केली. त्यानंतर सातत्याने आघाडी वाढवत सिंधूने दुसऱ्या गेमसह सामन्यावर कब्जा केला. दुसऱ्या गेममध्ये जोरदार रॅली, स्मॅशेस आणि नेटजवळचा अचूक खेळ सिंधूच्या खेळाचे वैशिष्टय़ ठरले.