महेश भूपती आणि सानिया मिर्झा या टेनिसपटूंना पहिल्याच फेरीत पराभूत व्हावे लागल्यामुळे एटीपी इंडियन वेल्स मास्टर्स टेनिस स्पर्धेतील भारताचे आव्हान संपुष्टात आले. भूपती आणि डॅनियल नेस्टॉर या तिसऱ्या मानांकित जोडीला पुरुष दुहेरीतील सलामीच्या सामन्यात स्पेनचा फेलिसियानो लोपेझ आणि कॅनडाचा मिलोस राओनिक यांनी ४-६, ६-७ (४) असे हरवले. महिला दुहेरीत सानिया आणि अमेरिकेची बेथनी मट्टेक सँड्स यांना अमेरिकेची लिसा रेमंड आणि ऑस्ट्रेलियाची समंथा स्टोसूर यांनी ७-६ (८), ३-६, ६-१० असे पराभूत केले. सोमदेव देववर्मनला मुख्य फेरीत स्थान मिळवण्यात अपयश आले होते. तसेच रोहन बोपण्णा आणि राजीव राम यांना पहिल्याच फेरीत गाशा गुंडाळावा लागला होता.