शतकवीर माजी क्रिकेटपटू रघुनाथ चांदोरकर यांचे निधन

वयाचे शतक साजरे करणारे देशातील तिसरे क्रिकेटपटू रघुनाथ ऊर्फ बापू चांदोरकर यांचे शुक्रवारी दुपारी वृद्धापकाळाने अंबरनाथ येथील कमलधाम वृद्धाश्रमात निधन झाले.

वयाचे शतक साजरे करणारे देशातील तिसरे क्रिकेटपटू रघुनाथ ऊर्फ बापू चांदोरकर यांचे शुक्रवारी दुपारी वृद्धापकाळाने अंबरनाथ येथील कमलधाम वृद्धाश्रमात निधन झाले. ते १०१ वर्षांंचे होते.

मधल्या फळीतील फलंदाज आणि यष्टीरक्षण हे वैशिष्टय़ असणाऱ्या चांदोरकर यांनी १९४३-४४ ते १९४६-४७ या कालखंडात महाराष्ट्राचे आणि १९५०-५१ वर्षांत बॉम्बेचे (मुंबई) सात प्रथमश्रेणी सामन्यांत प्रतिनिधित्व केले आणि एकूण १५५ धावा केल्या. ३७ ही त्यांची सर्वोच्च धावसंख्या होती. याशिवाय तीन झेल आणि दोन यष्टीचीत त्यांच्या खात्यावर आहेत.

प्रा. दिनकर बळवंत देवधर (१८९२-१९९३) आणि वसंत रायजी (१९२०-२०२०) यांच्यानंतर शंभर वष्रे जगणारे चांदोरकर हे तिसरे क्रिकेटपटू होते. त्यांचे प्रदीर्घ काळ डोंबिवलीत वास्तव्य होते. शंभरी ओलांडलेले एकमेव हयात असलेले क्रिकेटपटू म्हणून त्यांचा ‘एमसीए’ने गेल्या वर्षी खास सत्कार केला होता व त्यांना पेन्शन घोषित केली होती.

चांदोरकर यांचा मुलगा विजय व पत्नीचे बऱ्याच वर्षांपूर्वी तर कन्या डॉ. भाग्यश्री हर्डीकर यांचे काही वर्षांंपूर्वी निधन झाले. त्यांची दुसरी कन्या डॉ. जयश्री अमेरिकेत असते. सनदी अधिकारी श्रावण हर्डीकर हे त्यांचे नातू आहेत.

वयाच्या सत्तरीत चांदोरकर खेळाडूंना मार्गदर्शनासाठी मैदान गाठायचे. ठाणे, कल्याण-डोंबिवली आणि अंबरनाथ या पट्टय़ात त्यांच्याविषयी प्रचंड आदर होता. ऐंशीव्या वर्षीही ते चार किलोमीटरचे अंतर सायकलने पार करायचे. तंदुरुस्ती, आहार याकडे ते गांभीर्याने पाहायचे.

लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

मराठीतील सर्व क्रीडा बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App. ताज्या बातम्या (latest News) फेसबुक , ट्विटरवरही वाचता येतील.

Web Title: Former cricketer raghunath chandorkar passed away ssh

Next Story
ऑलिम्पिक पदकात पुण्याचाही वाटा -सायना
ताज्या बातम्या
फोटो गॅलरी