IPL 2025: निकोलस पुरनच्या षटकाराने रक्तबंबाळ झाला चाहता, थेट डोक्यावर लागला चेंडू अन्…, VIDEO होतोय व्हायरल

लखनौच्या मैदानावर झालेल्या सामन्याक स्टँडमध्ये बसलेल्या एका चाहत्याला त्याच्या एका षटकारामुळे गंभीर दुखापत झाली. त्यानंतर या चाहत्याला उपचारासाठी रुग्णालयात नेण्यात आले. निकोलस पूरनने एकाना स्टेडियमवर गुजरातविरुद्ध स्फोटक खेळी केली. यादरम्यान, त्याने १७९.४१ च्या स्ट्राईक रेटने ३४ चेंडूत ६१ धावा केल्या. ज्यामुळे लखनौने १८१ धावांचे लक्ष्य केवळ ४ गडी गमावून पूर्ण केले.

निकोलस पूरनने त्याच्या ६१ धावांच्या खेळीदरम्यान त्याने फक्त १ चौकार लगावला, तर तब्बल ७ षटकार लगावले आहेत. पण यातील एक षटकार स्टँडमध्ये बसलेल्या चाहत्यासाठी धोकादायक ठरला. निकोलस पूरनचा षटकारासाठी गेलेला चेंडू थेट स्टँडमध्ये बसलेल्या चाहत्याच्या डोक्यावर जाऊन आदळला. चेंडू आदळल्यानंतर चाहत्याच्या डोक्यातून भळाभळा रक्त वाहत होते.

या घटनेनंतर, चाहत्याला तातडीने उपचारासाठी रुग्णालयात नेण्यात आले. पण या चाहत्याच्या धाडसाचे पण कौतुक केले जात आहे, कारण उपचारानंतर तो स्टेडियममध्ये परतला आणि लखनौच्या विजयाचा आनंद साजरा करताना दिसला. या चाहत्याचे काही व्हिडिओ सोशल मीडियावर व्हायरल होत आहेत. या व्हिडिओमध्ये, उपचारानंतर या चाहत्याच्या डोक्यावर पट्टी बांधलेली आहे.

निकोलस पुरन या सामन्यात ऑरेंज कॅपच्या शर्यतीत सर्वात पुझे आहे. तो जवळजवळ प्रत्येक सामन्यात लखनौ सुपर जायंट्ससाठी त्याच्या बॅटने महत्त्वाचे योगदान देत आहे. या हंगामात आतापर्यंत त्याने ६ सामन्यांमध्ये ६९.८० च्या सरासरीने ३४९ धावा केल्या आहेत. ज्यामध्ये ४ अर्धशतकं देखील समाविष्ट आहेत. या हंगामात त्याने आतापर्यंत २६ चौकार आणि ३१ षटकार लगावले आहेत. यावेळी तो षटकारांच्या बाबतीतही आघाडीवर आहे. याशिवाय, त्याने एका हंगामात इतकं अर्धशतकं झळकावण्याची ही पहिलीच वेळ आहे.