ठाण्यातील मावळी मंडळ येथे सुरू असलेल्या राज्यस्तरीय कबड्डी स्पध्रेत पुरुष विभागात कुणबी सेवा संघ, भारत स्पोर्ट्स क्लब, तर महिला विभागात सावित्रीबाई फुले स्पोर्ट्स क्लब व शिवशक्ती संघाने तिसऱ्या फेरीत प्रवेश केला.
पुरुष विभागाच्या चुरशीच्या सामन्यात मुंबई उपनगरच्या कुणबी सेवा संघाने ठाण्याच्या नवरत्न क्रीडा मंडळाचा २३-२१ असा पराभव केला. सुशांत माडवकर याची उत्कृष्ट चढाई आणि सचिन सावंत याने दिलेली पकडीची साथ याच्या जोरावर कुणबी सेवा संघाने हा विजय मिळवला.
भारत स्पोर्ट्स क्लबने १०-१८ अशा पिछाडीवरून सर्वोत्तम खेळ करत यंग विजय क्रीडा मंडळाचा २४-२१ असा पराभव केला. जन्मैजय राणे, प्रथमेश कलझूनकर यांनी या विजयात मोलाची भूमिका बजावली.
महिला विभागात उपनगरच्या सावित्रीबाई फुले क्लबने शिवतेज क्रीडा मंडळाचा ३७-२१ असा दारुण पराभव केला. अंजली रोकडेने चढाईत, तर पूजा सुर्वेने पकडीत संघाचा विजयी मार्ग सुकर केला. शहरच्या शिवशक्ती संघाने नवी मुंबईच्या ग्रिफीन जिमखाना संघाचा ५५-२० असा धुव्वा उडविला. रेखा सावंतच्या उत्कृष्ट चढाया आणि काजल पेडामकरच्या पकडी यांना या विजयाचे श्रेय जाते.