T20 WC: भारताचं स्वप्न भंगलं; अफगाणिस्तानला नमवत न्यूझीलंडची उपांत्य फेरीत धडक

टी २० वर्ल्डकपच्या सुपर १२ फेरीत अफगाणिस्तानला पराभूत करत न्यूझीलंडने उपांत्य फेरीत धडक मारली आहे. अफगाणिस्तानने २० षटकात ८ गडी गमवून १२४ धावा केल्या होत्या. न्यूझीलंडसमोर विजयासाठी १२५ धावांचं आव्हान दिलं होतं. हे आव्हान न्यूझीलंड २ गडी गमवून १९ षटकात पूर्ण केलं. न्यूझीलंडच्या विजयानंतर भारताचं उपांत्य फेरीचं स्वप्न भंगलं आहे.

न्यूझीलंडचा डाव

अफगाणिस्तानने विजयासाठी दिलेल्या १२५ धावांचा पाठलाग करताना डेरिल मिशेलच्या रुपाने न्यूझीलंडला पहिला धक्का बसला. मुजीब उर रहमानच्या गोलंदाजीवर मोहम्मद शहजादने त्याचा झेल घेतला. त्याने १२ चेंडूत १७ धावा केल्या. त्यानंतर केन विलियमसन आणि गुप्टिल जोडीने डाव सावरला. संघाची धावसंख्या ५७ असताना मार्टिन गुप्टिल राशीद खानच्या गोलंदाजीवर त्रिफळाचीत झाला. त्याने २३ चेंडूत २८ धावा केल्या. या खेळीत ४ चौकारांचा समावेश आहे. केन विलियमसन आणि डेवॉन कॉनवे यांनी तिसऱ्या गड्यासाठी अर्धशतकी भागीदारी केली आणि संघाचा विजय सोपा केला.

अफगाणिस्तानचा डाव

अफगाणिस्तानने नाणेफेकीचा कौल जिंकत प्रथम फलंदाजी करण्याचा निर्णय घेतला. हझ्रतुल्लाह झझाई आणि मोहम्मद शहजाद जोडी सलामीला मैदानात उतरली. मात्र सलामीची जोडी काही खास करु शकली नाही. एडम मिलनेच्या गोलंदाजीवर अफगाणिस्तानला पहिला धक्का बसला. मोहम्मद शहजाद ११ चेंडूत ४ धावा करून तंबूत परतला. त्यानंतर लगेचच ट्रेन्ट बोल्टच्या गोलंदाजीवर हझ्रतुल्लाह झझाई २ धावा करून बाद झाला. . रहमनुल्लाह गुरबाज (६), गुलबदीन नइब १५ धावा करून माघारी पतरले. मात्र नजीबुल्लाह झाद्रनने एकाकी झुंज देत ४८ चेंडूत ७३ धावा केल्या. या खेळीत ६ चौकार आणि ३ षटकारांचा समावेश आहे. शेवटच्या षटकात झटपट गडी बाद झाल्याने अफगाणिस्तानला मोठी धावसंख्या उभारता आली नाही. मोहम्मद नबी (१४), करिम जनत (२), राशीद खान (३) अशा धावा करत तंबूत परतले.

दोन्ही संघांची प्लेईंग इलेव्हन

न्यूझीलंडचा संघ- मार्टिन गुप्टिल, डेरिल मिशेल, केन विलियमसन, डेवॉन कॉनवे, ग्लेन फिलिप्स, जेम्स नीशम, मिशेल सॅन्टनर, एडम मिलने, टीम साउथी, इश सोढी, ट्रेन्ट बोल्ट

अफगाणिस्तानचा संघ- हझ्रतुल्लाह झझाई, मोहम्मद शहजाद, रहमनुल्लाह गुरबाज, नजीबुल्लाह झाद्रन, मोहम्मन नबी, गुलबदीन नइब, करिम जनत, राशीद खान, नवीन उल हक, हमिद हसन, मुजीब उर रहमान