Lip Cancer Symptoms: सध्याच्या काळात कॅन्सर हा जीवघेणा आजार मोठ्या प्रमाणात वाढू लागला आहे. हा आजार अनेक प्रकारचा असून हा होण्यामागे बदलती जीवनशैली, व्यसनं, व्यायामाचा अभाव, आनुवंशिकता अशा अनेक गोष्टी कारणीभूत ठरू शकतात असं तज्ज्ञ सांगतात. कॅन्सरची काही लक्षणं सुरुवातीच्या टप्प्यात शरीरात दिसू लागतात. अशा वेळी तातडीनं निदान, उपचार गरजेचे असतात. ज्यात ओठांवर होणारा कॅन्सर सुरुवातीला किरकोळ भेगा, पांढरा ठिपका किंवा न भरणाऱ्या जखमेच्या स्वरूपात दिसून येतो. तथापि, डॉक्टर स्पष्ट करतात की तो दोन वेगवेगळ्या प्रकारचा असू शकतो. एक ओठाच्या बाहेरून दिसणारा आणि दुसरा आतल्या बाजूला विकसित होणारा.
ओठांचा कॅन्सर म्हणजे काय?
डोके आणि मानेच्या कॅन्सरचे सर्जन डॉ. कॅरोल लुईस यांच्या मते, बाहेरील ओठांना “कोरडे ओठ” म्हणतात, जे त्वचेसारखे असते तर आतील ओठांना “ओले ओठ” म्हणतात, जे तोंडाच्या नाजूक त्वचेसारखे असते. कोरड्या ओठांवर होणारे कर्करोग बहुतेकदा सूर्यप्रकाशामुळे होतात, तर आतील ओठांवर होणारे कर्करोग तंबाखू, धूम्रपान आणि अल्कोहोलशी जोडलेले असतात.
बहुतेक ओठांचे कॅन्सर हे स्क्वॅमस सेल कार्सिनोमा असतात. तोंड, जीभ आणि हिरड्यांचा पृष्ठभाग व्यापणाऱ्या या पेशीच असतात. सुदैवाने हा कॅन्सर फार लवकर पसरत नाही, परंतु जर दुर्लक्ष केले तर तो फुप्फुसांपर्यंत पोहचू शकतो.
दोन आठवडे न बरी होणारी जखम
ओठांवर होणारी कोणतीही जखम, भेग किंवा फोड जी १४ दिवसांनी बरी होण्याऐवजी आणखी वाढते हे सर्वात महत्त्वाचे लक्षण आहे. कोल्ड सोर्ससारखे विषाणूजन्य फोड दोन आठवड्यांत बरे होतात, परंतु कॅन्सर सोर्स बरे होत नाहीत आणि हळूहळू पसरतात.
ओठांवर उठलेली गाठ
जर तुम्हाला तुमच्या ओठांवर एक लहान गाठ, कडक गाठ किंवा असामान्य जाडपणा दिसला तर ते हलक्यात घेऊ नका. ही सूज स्पर्श केल्यास वेदनादायक असू शकते. आतून ती पांढरी किंवा लाल रंगाची दिसते, जी आजूबाजूच्या त्वचेपेक्षा वेगळी असते.
सतत जळजळ, वेदना किंवा सुन्नपणा
ओठांमध्ये कोणत्याही दुखापतीशिवाय जळजळ होणे, दंश होणे किंवा बधीर होणे हे कॅन्सरचे प्रारंभिक लक्षण असू शकते. बोलणे, अन्न चावणे किंवा मसालेदार पदार्थ खाल्ल्याने हे लक्षण अनेकदा बिकट होते.
ओठांचा रंग बदलणे
जर ओठांवर अचानक पांढरा, लाल किंवा तपकिरी डाग दिसला आणि तो गेला नाही तर ताबडतोब त्याची तपासणी करून घेणे योग्य आहे. हा रंगहीन भाग कालांतराने पसरतो.
ओठांच्या आकारात सूज किंवा बदल
जर ओठ अचानक सुजले, त्यांची लवचिकता बदलली किंवा खराब दिसू लागले तर हे देखील कर्करोगाचे लक्षण असू शकते. हे लक्षण अशा लोकांमध्ये सामान्य आहे, जे उन्हात बराच वेळ घालवतात आणि धूम्रपान करतात.
ओठांचा कॅन्सर का होतो?
- अतिनील सूर्यप्रकाशामुळे (कोरड्या ओठांचा कर्करोग)
- धूम्रपान आणि तंबाखू (ओल्या ओठांचा कर्करोग)
- जास्त मद्यपान
- सतत ओठ चावण्याची सवय
- कमकुवत रोगप्रतिकारक शक्ती